Kalaallit Nunaata sermersua siornatigorninngarnit tallimariaammik sukkanerusumik aakkiartortoq
Kalaallit Nunaata sermersua aatsaat taama sukkatigisumik aakkiartorpoq. Sermersuaq ingammik ukiut kingulliit 20-t ingerlanneranni sukkasuumik aakkiartorpoq.
Sermersuup aakkiartornera ukiunut 1980-ikkunnut 1990-ikkunnullu sanilliullugu tallimaariaammik aakkiartorpoq.
Taama paasisaqarlutik inerniliisut tassaapput, Københavns Universitetimi ilisimatusartut. Taakkua paasisaat ilisimatuussutsikkut atuagassiami, Nature Climate Changemi, saqqumersinneqarpoq.
Sermersuup ukiuni kingullerni 130-ni allanngoriartornera ilisimatuut misissorpaat. Sermersuup aakkiartornera qaammataasiakkut assilisanit timmisartuniillu assillisanit nutaanngitsunit malinnaavigineqarpoq.
Assit nutaanngitsut naalagaaffiup allagaateqarfianit Rigsarkivimit pissarsiaapput. Taakkua nunap assinginik assiliinermi atorneqartussatut allaaveqarput.
Assilisat nutaanngitsut 200.000-t ilisimatuut misissuinerminni atorpaat.
Sermersuup iigartartui tamakkerlugit ilisimatuunit misissorneqarsimanngikkaluartut taakkua aakkiartornerat qulakkeerlugu misisuinermi paasineqartoq, Anders Bjørk Københavns Universtitemi adjunkti oqarpoq.
Sermit iigartartui 1000-t missaannittut ilisimatuunit misissuiffigineqarput. Taakkualu annertussusaannik takussutissiilluartut, ilisimatuut nalilerpaat.
Sermersuup iigartartuisa sukkasoorujussuarmik aakkiartornerat isumakulunnartoq, Anders Bjørk isumaqarpoq.