Kalaallit Nunaata aningaasaqarnermik aqutsinera nersualaarneqarpoq

Nunarsuarmi aningaasarsiornikkut ajornartorsiortoqaleruttornerani, Kalaallit Nunaat Atlantikup Avannaani nunanit sanilerisaminit ajornartorsiunnginnerusoq, Chresten Sørensen isumaqarpoq.
oktobarip 15-at 2008 12:38

Allaammi nunani tamalaani aningaasarsiornikkut ajornartorsiorneq nunatta iluaqutigissagaa, aningaasarsiornermik ilisimatooq nunatsinni aningaasarsiorneq pillugu ministeriunermut siunnersuisartuni siulittaasuusoq, Chresten Sørensen isumaqarpoq.

- Kalaallit Nunaanni aningaaseriviit aningaaserivinnit allanit atukkatik tunngavigalugit atukkiisarsimanngillat. Aningaasarsiornikkullu mianersortumik ingerlatsisimallutik. Taamaattumik nunanut allanut sanilliullutik aningaasarsiornikkut ajornartorsiornermi eqqugaannginnerusutut oqaatigineqarsinnaapput, Chresten Sørensen oqarpoq nangillunilu:

- Massakkut pisunut atatillugu aamma erseqqissarusuppara, Kalaallit Nunaanni illuliortiterneq pisortanit aqunneqartorujussuummat, tassami aningaasaliiffigineqartarmat, aningaasaliissutillu killeqaqalutik. Taamaalilluni illuliortiterneq nakkutigineqarsinnaajuaannarluni. Tamanna soorlu Danmarkimit allaavoq, Danmarkimimi nunami pilersitat nalillit tamakkiisut 7 procentiat illuliortiternermut atorneqartarmat. Tamanna allaat USA-mit anneruvoq, USA-mimi 4 procentiummat. Taamaattumik pisortat aningaasartuutinik aqutsinerat pingaaruteqartorujussuuvoq, ingammik Kalaallit Nunaanni. Mannalu tikillugu Kalaallit Nunaat akisussaassuseqartumik aningaasarsiornermik ingerlatsivoq. Piffissami kingullermi, ukiup ataatsip missaani, Namminersornerullutik Oqartussat aningaasartuutaasa isertitanit amerlanerulernerat eqqaasanngikkaanni.

Chresten Sørensen aperineqarami Namminersornerullutik Oqartussat akisussaassuseqartumik aningaasarsiornermik ingerlatsinerat tatigineraa, akivoq aningaasarsiornermik ingerlatsinerup pingaartinneqarnera pitsaasuusoq, allaammi aningaasanut naalakkersuisuusimasoq mianersoqqusilluni tunuartariaqarluni. Tamatumalu kingornagut innersuussutai annerusumik malinneqarlutik.

Massakkorpiarlu 2009-mut aningaasatigut inatsisissaq suliarineqaleruttorpoq, tamatumuunakkullu ineriartornerup aalaakkaasumik ingerlaannarsinnaanissaa qulakkeerniarneqarluni, Chresten Sørensen oqarpoq.

Chresten Sørensenip aamma tikkuarpaa, Danmarkimi sanaartornermik suliallit suliffissaarusimanerat, sulisussanik Danmarkimit tikisitsinikkut Kalaallit Nunaata iluaqutiginiarsinnaagaa.