Kalaallit Nunaat USA-lu ukiumoortumik ataatsimeereerlutik isumalluartut
Kalaallit Nunaata, USA-p Danmarkillu Joint Committee-mi ukiumoortumik ataatsimiinnerat (Ataatsimoortumik Ataatsimiititaliaq aaqq.) ataasinngornermi pisoq maanna naammassilluarpoq.
- Ukioq manna ataatsimiinnermi ataatsimut soqutigisatsinnik suleqatigiinnitsinnillu aallaaveqartumik illuatungeriilluni ataqqeqatigiinnermik toqqammaveqartumik nukittuumik siunissamullu sammisumik pimoorussinerput uppernarsaqqipparput. Suleqatigiinnerup nangittumik ingerlanneqarnissaani pingaartitat ataatsimut soqutigisavut oqallisigaagut.
- USA-p Kalaallillu Nunaata ukiuni aggersuni siuariartornerup tamatuma nangittumik annertusarnissaa, Issittumilu nunarsuup immikkoortuani isumannaatsumik siuariartortumillu attaveqaatit nangittumik nukittorsarnissaat qilanaaraat, tusagassiutinut nalunaarummi allaqqavoq.
Joint Committeep Kalaallit Nunaata USA-llu akornanni inuinnaat pillugit suliassat suleqatigiinnerlu isumagisarpaa. Ukiumoortumik ataatsimiinneq naalakkersuisut amerikarmiullu naalakkersuisuisa atorfilittaanit ingerlanneqartarpoq. Atorfilittat danskit naalakkersuisuineersut aamma peqataapput.
Ataatsimiititaliaq Igalikumi isumaqatigiissut 2004-meersoq tunngavigalugu pilersinneqarpoq, USA-milu naalakkersuisut Kalaallit Nunaannilu naalakkersuisut oqaloqatigiittarnerannik tapersersuisarluni.
