Kalaallit Nunaat Tivolimi: Ileqquliussaq attanneqartuartussaq

Københavnimi Tivolimi nunarput 45-riarluni kalaallinit inunnillu allanit nalliuttorsiutigineqarnikuuvoq.

Ullumi 46-ssaat Kalaallit Nunaat Tivolertoqarneranut matut ammassapput.

Kalaallit Nunaata ukiuni arlalinni malunnartinneqartarnera pulaartut 20.000-it missaanniittunik ataatsimoorfiusarpoq, Tivolimi pisortaq, Kasper Schumacher, taama oqaluttuarpoq aammattaaq naatsorsuutigaa ukioq manna ullormut inuit ullormut 20.000-ngajaat aamma malunnartitsinermut peqataasassasut.

- Pulaartut tassaasarput inuit assigiinngitsut, ilaat Kalaallit Nunaat Tivolimut peqataasut ilaallu ileqqutoqqatut nuannaarsaatinik misiliiartortut, kisianni ukiut tamaasa pulaartartutoqqat amerlasuut peqataasarput, taanna oqarpoq.

Ileqquliussaq attanneqartuartussaq

Kalaallit Nunaat Tivolimi ingerlanneqaraangat Tivolimut aamma pulaartunut allanut annertuumik naleqartitsisarpoq.

Taamaammallu Tivolimi pisortap naatsorsuutigaa Kalaallit Nunaat Tivolimi ileqquliussaasoq attanneqartuarumaartoq.

- Maani Tivolimi ileqquliussat nuannarisuuagut, inunnillu pulaarusuttoqartarnera taamaakkallartillugu Kalaallit Nunaat Tivolimi ingerlanneqartuartassaaq, taanna oqarpoq.

Ukioq manna immikkut ittumik pisoqassaaq, tassami Milan Mathæussenip ukioq manna Avannaata Qimussersuanngornera, Tivolimi aqagu Plænenimi nalunaaqutaq 17.30 malunnartinneqassaaq.

Kalaallit nipilersortartut Plænenimi appissasut

Tamassuma kingorna akunnerup affaannaa qaangiuppat pulaartut tupaallatsinneqarnissartik qilanaarutigisinnaavaat.

- Aamma tassa tupaallatsitsisussaavugut, tassa aggustip aallaqqaataani nalunaaqutaq arfinermut. Aamma taamaaliornikuunngisaannarpugut, annertunerusumik oqaluttuarusunngilanga paasisaaqinaagut, Carsten Siegstad oqarpoq.

Tivolimi malunnartitsinermi Tarrak, Small Time Giants, Tulleriit, Qarsoq aamma Siissisoq unnukkut appisimaartuusassapput.

Coronavirusi peqqutaalluni 2020-mi Kalaallit Nunaat Tivolertoqanngilaq, 2021-milu Kalaallit Nunaat Tivolertoqarmat allatulaaq pisoqarpoq, aamma coronavirusi peqqutaalluni.

Ukioq manna pisussat ugguuna paasisaqarfigisinnaavatit.