Kalaallit Nunaat Pituffimmut tunngatillugu taarsiivigeqquniarpoq
DANMARK: Statsministeriaqarfimmi ullumi tusagassiortunik katersortitsisoqarnerani Naalakkersuisut siulittaasuata Kim Kielsenip ilisimatitsissutigaa Kalaallit Nunaat Danmark suleqatigalugu USA-p Pituffimmi sakkutooqarfimmik atuineranut atatillugu piumasaqaateqarniartoq. Tamannalu pissaaq suliffeqarfiup Elexis Services A/S-ip, amerikamiut suliffeqarfiutaannit Vectrusimit pigineqartup, Pituffimmi sakkutooqarfimmi kiffartuussinissamik suliaqarnissaa amerikami oqartussaasunit aalajangiusimaneqaannassappat.
- Taamaammat Naalakkersuisut Danmark suleqatigalugu taarsiivigineqarnissamik aamma/imaluunniit atuinermut akiliuteqarnissamik piumasaqaateqarniarpoq, ukiut 50-it sinnerlugit ileqquusimagaluarmat Pituffimmi sakkutooqarfik inuiaqatigiinnut kalaallinut aningaasatigut iluaqutissartaqartinneqassasoq, Kim Kielsen oqarpoq.
Danskit kalaallillu suliffeqarfiisa pingasut suliariumannittussarsiuussinerup inernera pillugu amerikami maalaaruteqartarfimmut maalaaruteqarnerisa kingorna taama oqarpoq. Kalaallit Nunaata/Danmarkip USA-llu akornanni illersornissaq pillugu isumaqatigiissutaasoq naapertorlugu, USA suliassamut tunngatillugu 'sapinngisamik' danskit kalaallilluunniit suliffeqarfiutaannik atuisussaavoq.
USA-p suliamik ingerlatsisimanera naammaginartinngilaa
Ministeriunerup Helle Thorning-Schmidtip tusagassiortunik katersortitsinermi arlaleriarluni aamma oqaatigaa amerikamiut sakkutooqarfimmik atuinerat 'sapinngisamik annertunerpaamik inuiaqatigiinnut kalaallinut iluaqutissartaqartinneqassasoq’.
Suliariumannittussarsiuussinermili aalajanginermi maanna pisimasumi taamatut pisoqarsimarpasinngitsoq, Naalakkersuisut siulittaasuata oqaatigaa.
- Suliffeqarfiit neqerooruteqarsinnaasut Danmarkimeersuullutillu Kalaallit Nunaanneersuunissaat erseqqissumik piumasaqaatigineqarpoq. Taamaammat Naalakkersuisut isumaqanngillat suliariumannittussarsiuussinissamut isumaqatigiissutaasoq USA-p eqquutsissimagaa, aamma suliariumannittussarsiuussinerup taamatut inerneqarnera inuiaqatigiit kalaallit amerikamiut sakkutooqarfiannit annikinnerusumik pissarsiaqartalernerannik kinguneqassaaq.
Pituffimmi sakkutooqarfimmi kiffartuussinissamik isumaqatigiissutip suliariumannittusarsiuunneqarnerata inernera pissutigalugu, Kalaallit Nunaata akileraarutitigut isertitanik millioninik 100-nik arlalinnik annaasaqarnissaa Kim Kielsenip aamma naqissuserpaa.