Assi: United Nations Photo/Flickr

Naalakkersuisooqatigiit: Kalaallit Nunaat Naalagaaffiit Peqatigiinni immikkut sinniisoqassaaq

Nunanut allanut politikkikkut ilaatigut Kalaallit Nunaat Naalagaaffiit Peqatigiinni immikkut sinniisoqalernissaa nunanullu allanut upalungaarsimanermullu politikkikkut sunniuteqaqataanerulernissaa Naalakkersuisooqatigiit kissatigaat.

Naalakkersuisooqatigiit nunat tamalaat akornanni suleqataasinnaanissamut periarfissatik annertusarusuppaat. Siumut, Atassut, Nunatta Qitornai aamma Partii Naleraq Naalakkersuisooqqatigiit isumaqatigiissutaanni allapput:

- Naalakkersuisooqatigiit kissaatigaat Nunarput Avannaarsuani pingaaruteqartumik inissisimalluarnini patsisigalugu nunarsuarmioqatigiit ineriartoqatigiinneranni sunniuteqarnerulissasoq. Taamaattumik Naalakkersuisooqatigiit kissaatigaat Nunarput nammineq FN-imi sinniisoqalissasoq.

Naalagaaffiit Peqatigiinni ilaasortanngorneq

Naalagaaffiit Peqatigiinni immikkut sinniisoqalerniaraanni naalakkersuisuisa qinnuteqaataat FN-imi sinniisaasa tigusimasussaavaat. Nuna qinnuteqannginnermini FN-ip piumasaqaataanut naleqquttussaavoq.

FN-ip sillimaniarnermut sinniisaanni nunat ilaasortat 15-usunit 9-t akuersisimaqqaartariaqarput. Tassani aaliangersimasumik ilaasortat – Frankrig, Kina, Rusland, Storbritannien aamma USA – qinnuteqaat akuereqqaartussaavaat.

Sillimaniarnermut sinniisut akuersissappata qinnuteqaat FN-ip ataatsimeersuarneranut ingerlateqqinneqassaaq tassani nunat 193-usuni pingajoraarterutit marluk akuersisimassallutik.

Aallerfik: FN'imi maleruagassat

Ullumikkut Kalaallit Nunaat FN-imi Danmark aqqutigalugu sinniisoqarpoq, Kalaallillu FN-ip ataani nunap inoqqaavisut nalunaarsorneqarnikuullutik.

FN-imi maleruagassaatnaapertorlugit sillimaniarnermut sinniisunit ataatsimmersuarnermilu nunat 193-init akuerinaqarsimasut, nunat eqqissinermut angertut tamarmik tikilluaqqusapput

 

Nunani allani sinniisoqarnerit annertusarlugit

 

Nunat tamalaat akornanni Kalaallit Nunaat akuunerulissasoq Naalakkersuisooqatigiit isumaqarput. Assersuutigalugu Kalaallit Nunaat EU-llu akornanni suleqatigiinneq annertusarneqassaaq, Kalaallit Nunaat EU-mut ilaasortannginngikkaluarluni.

Suleqatigiiffioreersunilu nunani Namminersorlutik Oqartussat sinniisoqarfinnik pilersitsinikkut annertusaassaaq.

-Tamanna isumaqarpoq siunissami minnerpaamik nunani sanilitsinni nunanilu niuernikkut, inuussutissarsiornikkut ilinniartitaanikkut il.il. suleqatigisatsinni nunarput aallartitaqarfeqassasoq, isumaqatigiissummi allaqqavoq.

USA-mut toqqaannartumik isumaqatiginninniartarneq

Naalakkersuisooqatigiit nunanut allanut sillimaniarnermullu oqartussaanertik annertsarusuppaat pingaartumik USA-mut tunngatillugu, Pituffik:

- Amerikkarmiut nunatsinni sakkutooqarfeqarnerat pillugu nunatta toqqaannartumik USA-mut isumaqatigiissuteqartalernissaa naalakkersuisooqatigiit anguniarpaat, isumaqatigiissummi allassimavoq.

Sakkutooqarfimmi sullissinissamut isumaqatigiissut amerikarmiut suliffeqarfiutaannut atsiorneqarmalli Pituffik oqallisaangaatsiarsimavoq. Taassuma kinguneraa 2015-imi sullissinermut isumaqatigiissutip imarisassaanik nutaamik piumasaqaatitalimmik sanasussanik suligasuartussanik Danmark Kalaallillu Nunaat pilersitsimmata.

Naalagaaffeqatigiillu siunnersuutaat maannamut USA-mit itigartinneqartarsimavoq.

Atsiortut nutaat kinunerisaanik Naalakkeruisooqatigiilertarsimasut arlallit Danmarkip USA-llu akornanni isumaqatigiissutip allanngornissaa siunnersuutigisarsimavaat, tamannalu Thorning-imit Løkke-millu itigartinneqartarsimavoq.

Danmarkip Kalaallit Nunaannut tuppallersaatigalugu ukioq manna sakkutooqarfikunik torersaanerit akilerniarlugit neriorsuisimapput, arlallillu minillugit soorlu Camp Century.

Naalakkersuisut isumaqatigiissutaanni allaqqavoq:

- Nunatsinni sakkutooqarfiusimasuni avatangiisit pinngortitallu akisussaaffiup inissinneqarnissaa qulakkeerniarlugu naalakkersuisooqatigiit suliniuteqassapput.

Isumaqatigiissumi allaqqavortaaq Kalaallit Nunaat namminiilivikkuni NATO-mi imikkut aamma sinniisoqassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat