Nuannarineqalerniarneq: - Kalaallit Nunaat Europalu suleqatigiinnerulissapput

Inuppaaluit takornartat Inatsisartut ataatsimiittarfiata silataani eqiterupput. Tassa tusagassiortorpaat politikererpaaluillu nuimanerit nuannarineqalerniarlutik nunatsinniipput.

EU-mi politikerit nunatsinnut tikeraarnerat pisortatigoortuunngilaq, taakkunanngali ataaseq Europa-Parlamentip suleqatigiissitaanni annerpaat sisamaanneersuuvoq, tassa Renew-gruppimeersuuvoq – suleqatigiissitaq taanna liberalit partiianneersortaqarpoq. Taakkua suliffeqarfiit politikerillu paasisassarsiorfigiartorlugit nunatsinniipput.

Renew-gruppip siulittaasua Valerie Hayer aamma EU-p nunanut allanut tunngasuni ataatsimiititaliaata siulittaasuata tullia Urmas Paet nunatsinnut tikeraaqataasussaagaluarput.

Stine Bosse (M) aamma Morten Løkkegaard (V) Inatsisartut ataatsimiittarfiannut iseriartortut. Royal Greenlandimeersunik aatsitassarsiortitseqatigiiffillu Luminameersunik kingorna aamma ataatsimeeqateqarput. Assi © : KNR / Markus Valentin

EU-mili politikerit qallunaat, tassa Stine Bosse (M) aamma Morten Løkkegaard (V), marluinnaallutik nunatsinnut tikeraarput, tikeraaqatissaraluimi allat silarlummat peqataanngitsuuinnarput.

Morten Løkkegaard Renew-gruppimi siulittaasumut tullersortaavoq, Stine Bosselu nunatsinni suliffeqarfiit ilaata, soorlu Nunaoilip aamma Tusassip siulersuisuini ilaasortaanikuuvoq.

- Qujanartumik oqarsinnaavunga aliannaarlunga, Stine Bosse oqarpoq nangillunilu:

- Nunarsuarmi tusagassiorfiit Bruxellesimiit malinnaaffiginerisigut ernumaammernartoqarsoraara. Taamaammat kalaallit pisunut aalassassimaaruteqarnersut qanorlu eqqarsaateqarnersut tusarnaarniarlugit maanga paasisassarsioriartortariaqarsimavugut. EU-mut atassuteqarneq ullumikkut qanoq innersoq ajunnginnerusinaanersorlu taamaaliornikkut takusinnaarusullutigu.

Kalaallit Nunaat EU-mut ilaasortaaleqqilli

Donald Trumpip nuanninngitsumik nalunaaruteqarneri aammali EF-iusimasumit maanna EU-jusumit Kalaallit Nunaat siullersat ilaanniilluni ilaasortaajunnaarneraniit ukiut 40-nngortut angalaneq pivoq.

Kalaallit Nunaat taamaalluni namminiilivissagaluarpat EU-mut ilaasortanngoqqinnikkut nuna illersorluarneqarsinnaanerussasorigini, Morten Løkkegaard pingasunngormat oqarpoq.

KNR-imilli ima aperigatsinni allatutut nipilimmik oqaaseqarpoq:

Naalakkersuisut amerikamioorusunnatik imaluunniit qallunaajorusunnatik kisianni kalaaliorusullutik oqareerput. Taava Kalaallit Nunaat europamioorusulersoraajuk?

Politikerit marluk EU-meersut EU-p nunatsinni allaffiata pisortaq Simon Bojsen-Møller ataatsimeeqatigeriarlugu Mimi Karlsen (IA) aamma Múte B. Egede (IA) aamma ataatsimeeqatigisussaagaluarpaat. Múte B. Egedeli pisinnaajunnaarluni nallinngitsiartoq nalunaaiataarmat, naalakkersuisoqarfiata pisortaata paarlappaa. Assi © : KNR / Markus Valentin

- Oqaaseqaatit taakku tusagassiortunit mersernasaalaagaapput. Kalaallit Nunaat Europalu suleqatigiinnerulersinnaagaluartut inuttut nammineerlunga isummersuutigaara. Soorunami tamanna kalaallit namminneq aalajangigassaraat. Tamannalumi qallunaat naalakkersuisuisa isummersuutigaat uangattaarlumi taama isumaqarluinnarpunga.

- Taamaattumik tamatumannga suleqatigiinnerulertoqarsinnaagaluarpat qanoq nuannertigissagaluarnera inuttut nammineq isumaliutigineqarsinnaavoq kisianni kalaallit namminneq aalajangigassaraat qanoq aamma qaqugu tamanna piumaarnersoq.

EU Kalaallit Nunaannik pimoorussinissaminut paamaarpallaarsimappat?

- Tamanna nassuerutissaasoq isumaqarpunga. Qularutiginngilarput, Morten Løkkegaard oqarpoq.