Nunatsinnukaqqusiunnaarneq iluaqutaasinnaavoq, naammannanili
Nunarput nunarsuarmiunit allanit qanillitsaaaliuminartuuvoq. Qeqertaavormi avinngarusimareersoq, nunatsinnilu illoqarfiit nunaqarfiillu imminnut ungasittuullutik.
Taamaattumik Kalaallit Nunaanni killeqarfinnik matusineq nunanut allanut soorlu Danmarkimut sanilliullugu sunniuteqarluarsinnaavoq, Syddansk Universitetimi tunillannartunik nappaatilerinermi professori Hans Jørn Kolmos, nappaatinik tunillaattartunik suussusersiinermik siaruatsaaliuinermillu inuunermi annerpaartaani suliaqarsimasoq, oqarpoq.
- Nappaalasoqarnerani qeqertami tuniluuffiunngitsimiinneq qeqertami tassani tuniluuttoqalinnginnissaanut sunniuteqarluarsinnaavoq, taanna oqarpoq.
Nuummi sisamanik tunillanneqarsimasoqareerpoq. Nunatsinnili oqartussat Nuummiit angallaqqusiunnaareerput. Tassa tuniluunneq nunatta sinneranut annguteqqunagu nunatta sinnera nunarsuup sinneranit qanillitsaalineqarpoq.
Nunatsinnukaqqusiunnaarneq siusittariaqartoq
Hans Jørgen Kolmosip oqarnera naapertorlugu qanilitsaaliinerup iluaqutaanissaanut pingaaruteqarluinnartut marluupput. Tassa nunatsinnukaqqusiunnaarneq sunniuteqarluassappat pimoorulluinnartariaqarpoq, taamaaliornerlu siusittariaqarluni.
- Tuniluuttoqalereersimappat killeqarfinnik matusineq iluaqutaangaarnavianngilaq, Hans Jørn Kolmos oqarpoq.
AAMMA ATUARUK Nuuk matuvoq: Nalunaaqutaq 16:00-imiit ima ilioqqusaanngilatit
Innuttaasut peqqissusaat pillugit professori Danmarkimeersoq, Lone Simonsen, Danmarkimi nittartakkakkut nutaarsiassaqartitsivimmi dr.dk-mi allaaserisaq Danmarkimi killeqarfiit matuneqarnerannut tunngasoq pillugu taamatukanneq DR Nyhederimut aamma oqarpoq.
- Suliniuterpassuagut allat soorlu aaqqissuussanik taamaatitsiinnarnerit atuarfinnillu matusinerit assiigimmik, tassa tuniluunnermik nappaalanermillu pakkersimaarinninnissanik, siunertaqarput.
- Tuniluuttoqarfiulereersumilu killeqarfinnik matusineq iluaqutaanavianngilaq. Sunniuteqarnavianngilaq, Lone Simonsen DR Nyhederimut oqarpoq.
Innuttaasut inassutit malissavaat
Nunatsinnukaqqusiunnaarlunilu nunatsinniit aallaqqusiunnaarneq tunngaviatigut kingusinaarneruvoq, tunillanneqarsimasutut Nuummi paasineqaqqaartoq sapaatit akunnerata kingulliup aallartinnerani nalunaarutigineqareernerani tallimanngornermi pimmat.
Nunatsinnili oqartussat nunatsinni illoqarfiit pingaarnersaat, Nuuk, pingasunngornermi matuaat. Nuuk apriilip ulluisa arfineq-pingajuata tungaanut atuuttumik qimanneqaqqusaanngilaq. Taamaattumik nunatsinni tuniluuttoqannginnissaa anguniarlugu nunarput piffissaatillugu matuneqarsimasutut immaqa oqaatigineqarsinnaavoq.
Tunillaassuinaveersaarnissamut innersuussutit ukuupput:
- Asalluartarneq ajornanngippat asareernermi assaallu panerneranni assanut tunillannartuiaat atorlugu eqqiluisaarluarneq
- Inuit nuattut/toqqusaarluttut qanillinaveersaarneri
- Kakkissarfimmut ataasiartakkamut ikutsilluunniit peqiffianut quersorlutillu tangajortarit
- Kuniuinak, eqitaarinak assammiinallu
AAMMA ATUARUK Tamaat isigalugu: Coronavirus pillugu killiffik
Nunamili killeqarfinnik illoqarfiillu pingaarnersaannik matusineq naammanngitsut, Hans Jørn Kolmos oqarpoq. Innuttaasut peqqissutsimut oqartussat eqqiluisaarnermut inunnullu qanillattunnginnissamut inassutaannik malinneqqissaarnissaat pingaaruteqartoq, taassuma erseqqissaatigaa.
- Tuniluuttoqalissagaluarpammi illersoriarfissaqanngilluinnarmata. Kalaallit Nunaannullumi anngutereerpoq, taamaattumik nunami tasssani siaruatsaalineqartariaqarpoq.
Killeqarfiillu arlaanni ammarneqaqqittussaanerat, nunarsuarmili aamma nappaalasoqarnerata qaangiunniarnera sivisusinnaasoq aamma eqqumaffigineqassapput.
Matusineq isumatusaartumik atugassaasoq
- Kalaallit Nunaanni killeqarfiit ammarneqaqqippata coronavirusip nunani sanilini tuniluuttuarsinnarnera akuersaarneqarumaarpa? Taamaaliortoqanngippat matusineq sivisorataannaavoq.
Kalaallit Nunaannukaqqusiunnaarnikkut Nuummillu matusinikkut coronavirusip Kalaallit Nunaanni siaruatsaalineqarpat, tamanna tuniluunnermik kinguarsaanerusoq, Hans Jørgen Kolmos oqarpoq. Tamatumalu atorluarnissaa pingaaruteqarpoq.
- Peqqinnissaqarfiup piginnaanngorsarnissaanut, naammattunik siniffiuteqalernissaanut taavalu inuit sapinngisamik ikinneerpaat tunillaanneqaatigisinnaasaannik imminnut naperiaaseqarnissaannik ilitsersuunnissaannut.
- Nunamili killeqarfiit ammaqqinneranni nunarsuarmi nappaalasoqartuarsinnarpat iliuuseqartoqarsimanngippallu killeqarfinnik matusinnginnermitulli pisoqaqqissaaq. Piffissaq tuniluussinnaasup pinaveersaartinniarnissaanut piareersarnissamut isumatusaarluni atugassaavoq, taanna oqarpoq.