Kalaallit Nunaanni Politiivini pigaartut ini suliffigisartagaat nutarterneqarpoq
Nuummi Politeeqarfimmi ukiup affaata ingerlanerani sanaluttoqarsimavoq.
Politiinngorniarfittut atuuffeqarnikoq pigaarfiliarineqarluni nutarsarneqarpoq, maannakkullu piareersimalerpoq.
- Maanngaanniit, oqarutta Kalaallit Nunaat tamakkerlugu marserluarnerusinnaaninngorparput, periarfissarissaarnerulerlutalu, Kalaallit Nunaanni Politiit pigaartuisa pisortaat Carl Sværd oqarpoq.
Sulinerup pitsaanerpaaniitinnissaa anguniarlugu nutarterineq pisariaqarsimasoq, pigaartuni aqutsisuullunilu politikommissæri Brian Thomsen oqarpoq:
- Sulisunut pissutsit pitsaanerpaanissaa pingaaruteqarpoq, tamannalu nutaanik sinaakkutiinik pilersitsinikkut, atortorissaarutinillu ullutsinnut tulluunnerusunik amerlisitsinikkut anguarput. Tamanna nuannaarutigaarput.
Init qaamaninngortinneqarnerata saniatigut, aammattaaq silaannarissarfiit pitsanngorsarneqarput, ini inissaqarluarnerulerpoq, aammalu atortut nutaat inissaqartinneqalersimallutik.
- Atortorissaarutinik nutaarpassuarnik nutaalianik pissarsisimavugut, taakkulu assigiinngitsorpassuartigut iluaqutigissavagut. Ilaatigut nuna tamakkerlugu isertitsiviit nakkutigilluarsinnaanerulerlugillu attaveqatigilluarsinnaanerulerpagut, politikommissæri Brian Thomsen nassuiaavoq, nangillunilu:
- Ilaatigut aamma paasissutissanik avitseqatigiinnissamik ajornannginnerulersitsivoq, aammalu tamakkiisumik isiginninnissatsinnut iluaqutaalluni. Pinartumik pisoqassagaluarpat maanngaanniik pigaarfimmiit pisut malinnaaffigisinnaavagut. Tamannalu nuna tamakkerlugu periarfissanik nutaanik tunisivoq, naak Nuummi inissisimagaluarluta.
Tamaat ilinniarneqassaaq
Pigaarfik ulluni 14-ini piareersimalerpoq, maannakkullu aatsaat sulisut iserterput. Tamatumunngalu peqqutaavoq atortut nutaat tamakkerlugit ilinniarneqaqqaartariaqarsimaneri.
- Pigaarfik siulianit allaanerusumik sananeqarpoq, taamaattumillu sulisut isertinnginneranni pisariaqarsimavoq ilinniarnissaq sungiusarnissarlu, Brian Thomsen oqarpoq.
Sulisummi ulloq unnuarlu nuna tamakkerlugu innuttaasunut ikiuussinnaanissaat anguniarlugu sunik tamanik ilisimanninnissaq pingaaruteqarpoq.
- Qulakkeerniarsimavarput sulisut tamarmik piareersimalluarnissaat, aammalu periutsit suleriaatsillu nutaat sulisunit paasineqarluarsimanissaat. Maannakkullu taamatut inissisimalerpugut, qilanaaraarpullu suleriutsimut nutaamut sungiussinissatsinnut, pigaarfimmi aqutsisoq taama oqarpoq.
