Kalaallit Nunaanni Politiit toqusoqarnerata kingorna: Ikiaroornartunik iioraasarasi!
Angut naamigut anniartorujussuaqaggustip arfineq aappaani Nuummi nakorsiartarfiliaanneqarpoq.
Taanna passunneqarnermi nalaani uummamminik unittoorpoq. Toqqutaalu paasiniarlugu pilallugu misissorneqarmat ikiaroornartunik poortukkanik naavani inalugaanilu nassaarfigineqarpoq.
Nalunaarsorneqartut amerliartortut
Inuk aamma alla Danmarkimiit nunatsinnukartilluni ikiaroornartunik eqqusseriarluni iioraasimanini peqqutigalugu qaammatip aappaa affarlu sioqqullugu toquvoq.
Inuit aqqanillit qaammatip ataatsip ingerlanerinnaani ikiaroornartunik iioraallutik nunatsinnut eqqusseriaraluarsimasut, ilanngaaserisut nalunaarutigaat.
AAMMA ATUARUK Timmisartorsuarmi Kangerlussuarmukartumi toqusoqartoq
Taamatullu ikiaroornartunik poortukkanik iioraalluni eqqusseriarneq inuunermik ulorianartorsiorfiusarpoq.
Tamanna pillugu nunatsinni nakorsaaneq ima oqaaseqarpoq:
- Ikiaroornartoq kokaini assigisaaluunniit poortorsimasoq putuppat, sivikitsuinnarmi siaruaatissaaq uummammullu unittoorutaasinnaalluni. Ikiaroornartorli hashi taamaalippat toqqutaasinnaanera annikinneruvoq, kisianni sunaluunniit poortorsimasoq putuppat inalukkanut qissallattoorutaasinnaavoq, inuunermullu ulorianartorsiortitsilluni. Taakku poortornikut naap iluani inalukkamiluunnit unissinnaasaramik ingerlariaqqinnaveerlutik, nunatsinni nakorsaaneq Henrik L. Hansen politiit tusagassiuutinut nalunaarutaanni allappoq.
Eqqartuussaanermik kinguneqartarput
Ikiaroornartumik nunatsinnut eqqusseriarneq eqqartuussaanermik kinguneqartarpoq. Kalaallit Nunaanni Politiini unnerluussisussaatitaaneq Morten Nielsen taama oqarpoq:
- Pisoq ilungersunartorujussuartut isigaarput, eqqartuussinermik kinguneqartarpoq. Suliamullu taamaattumut pillarneqaraanni, allanik aamma pineqaatissiinissaq pinngitsooruminaattarpoq – kingunerisaanillu pillagaasimanermut uppernarsaammi aamma allaqqalertarpoq. Tamanna inuup ataatsip suliffeqarniarneranut inuuneranullu innarliisarpoq, Morten Nielsen oqarpoq.
AAMMA ATUARUK Politiit pisortaat: Ikiaroornartut sakkortunerusut nunatsinni peqartartoq
Ikiaroornartunik eqqusseriartutut nalunaarsorneqartartut ukiuni kingullerni amerliartorput. Assersuutigalugu ikiaroornartumik eqqusseriarlutik timiminnik ikiaroornartumik nassaarfigineqartut ukioq mannaannaq 28-iupput. Siorna inuit 14-it nalunaarutigineqarput.
Kalaallit Nunaanni Politiit nalunaarutaanni kisitsisit ima isikkoqarput:
