Timmisartorsuarmi Kangerlussuarmukartumi toqusoqartoq

Timmisartorsuarmi Københavnimit Kangerlussuarmukariartortumi ippassaq pingasunngornermi toqusoqarpoq. Tamanna politiit KNR-imut uppernarsarpaat, pineqartumullu qanigisaasut kalerrinneqareersimanerarlugit.

Politiit suliamik misissuisoqarnera pissutigalugu toqusoqarneranut atatillugu allamik oqaaseqarsinnaanngillat.

Toqusoqarnera timmisartumi Air Greenlandip attartugaani pivoq.Timmisartoq pineqartoq Jet-Time-mimeersuuvoq, taannalu Københavnimit Kangerlussualiartuulluni. Timmisartoq Kangerlussuarmut mimmat suliaq oqartussanit tiguneqarpoq.

Air Greenlandimi Public Relations Managerip pisuni ilanngutitinneqartut ikiorsiiniarnermik aallartitsisoqartoq oqaatigaa.

- Timmisartumi jet-time-mimi ippassaq pingasunngornermi nalinginnaasumik angallassinitsinni pisoqarnera uppernarsarparput. Pisumi peqataasut isumagaagut, pisariaqartinneqartumillu ikiuinissatsinnik aallartitsilluta, Inga Dóra Guðmundsdóttir Markussen oqarpoq.