Kalaallit Nunaanni pinngortitaq teknologii eqqarsaatigalugu ornigarneqarlualersinnaanerarpaat
Uumasunut tappiorannartunut ilisimatuut Peter Stougaard aamma Marianne Schmidt Københavnip Universitetianeersut Kujataani Ikkami enzyminik ujarlersimapput.
Taqqavani bakteeriat arlallit Ikkap kangerluani sukaasani uumasuusut immikkoortinnissaat iluatsisimavaat. Ilisimatuut marluk atuagassiaq Polarfronten naapertorlugu enzymi nutaaq immuup sukkuinik, stoffimik pingaartumik inuit Asiamiittut Afrikamiittullu sapigaannik avissaartitsisinnaasoq, ineriartortillugulu namminneq nassaamittut uppernarsaasertippaat.
Immuup sukkui nalinginnaasumik laktose enzymiligaq atorlugu peerneqarsinnaagaluarput. Laktosili inip kissassusianiitillugu immummut akuliunneqartarluni. Tamatuma immuk mamaannerulersittarpaa. Maannali uumasunut tappiorannartunut ilisimatuut Københavniminngaanneersut uumasut tappiorannartut Ikkap kangerluata bakteeriai iluaqutigalugit periaatsimik nutaamik ineriartortitsisarneq iluatsippaat, immuup sukkui nillataartitsivittut nillissuseqartumi peerneqarsinnaasunngorlugit.
Tassa imaappoq atuisartut immuup sukkuinik sapigaqartut immuit kartonniinik bakteerianik Ikkameersunik akusanik atuisinnaanngorput.
Uumasunut tappiorannartunut ilisimatooq Peter Stougaard Polarfrontenimut oqarpoq, nammineq suleqatinilu Marianne Schmidt manna tikillugu Namminersorlutik Oqartussanit ilisimatusarnissamut akuersissut naapertorlugu suliaqarlutik. Enzymi iluanaarniutigalugu tuniniarneqalissapat aningaasatigut isertitsissutaasinnaasut qanoq agguataarneqarnissaat pillugu Namminersorlutik Oqartussat isumaqatigiissuteqarfigineqartussaapput.
Taassuma aamma oqaatigaa nammineq suleqatinilu Ikkap kangerluani inalugallit kemii atorlugu aallarnisaataasumik misissorsimallugit, paasinarsivorlu sananeqaat eqqumiikajaartoq immaqa aamma kræfteqalernissamut akiuussutissamik akoqarsinnaasoq nakorsaasiornermi atorneqarsinnaasumik. Taamaalilluni immaqa aatsitassarsiornerup saniatigut akuutissatigut isertitassat ilimagineqarsinnaapput.
