KNR Kalaallit Nipilersugaasa Ulluanni saqqumilaartitsineq
Nipilersukkat nuannarineqarluartut, kalattuut, erinniarsuit aamma erinarsoqatigiit. Tassa nunatsinni nipilersornerup silarsuaanit periarfissarpassualimmi siammasissumilu tusartakkavut. Nipilersornerup silarsuaa saqqumilaartinniarlugu KNR Nunatsinni Nipilersortartut Kattuffiat aamma illoqarfinni radioqarfiit isumaqatigiipput Kalaallit Nipilersugaat Ulloqalissasut.
KNR-imi pisortaq Karl-Henrik Simonsen aamma Nunatsinni Nipilersortartut Kattuffianni siulittaasoq Inunnguaq Petrussen
Allattoq Paasissutissat KNR / KNR Info
septembarip 26-at 2019 10:38
Tamannalu siullermeertumik ukioq manna oktobarip aallaqqaataani pissaaq.
Ullormi tassani kalaallit nipilersugaat tamalaat atorneqartassapput, aallakaatitassianilu immikkut aamma sammineqarsinnaallutik.
Nunatsinni nipilersukkat ulloqarnissaat pisariaqarsoraarput ullutsinni studiami saqqummersitsiniarneq ajornarsinikuummat, kopeerisarneq annertummat, internetikkullu akeqanngingajattumik nipilersukkanik aallertoqarsinnaasarmat. Tamakkiisumillu isigissagaanni nipilersukkat nalikilliartuinnarmata, nuannersumut saatillugu kalaallit nipilersugaat nersorlugit, eqqarsartitsilaarnissamullu periarfissiilluta, Nipilersortartut Kattuffiani siulittaasoq Inunnguaq Petrussen oqarpoq.
Nipilersukkat KNR-imit appisimaarneqartartut affaasa missarluinnaat kalaallisuujusarput. Ukioq 2018 assersuutigissagaanni nipilersukkanit appisimaarneqartunit 46 procentit kalaallisuujupput.
KNR-miit aallakaatitatsinni kalaallit nipilersugaannik atuinerput annertoreeraluartoq, nunatsinni taalliortunik, erinniortunik nipilersortartunillu tapersersuinerput tusartikkusullugulu takutikkusupparput. Nipilersugassiortut piginnaasaat atugaallu ullormi tassani saqqummersikkusuppavut, aamma aaqqissuisoqarfinni assigiinngitsuni imarisatigut sammisaqarnikkut, Karl-Henrik Simonsen KNR-imi pisortaq oqarpoq.
Maannamut Qaqortumi, Sisimiuni Aasiaanni Upernavimmilu radioqarfiit Kalaallit Nipilersugaasa Ulluanni peqataanissartik nalunaarutigereerpaat.
Ullormi tassani peqataasut piffissap ingerlanerani amerliartuinnarumaartut isumaqatigiissuteqartut neriuutigaat.
Ukiut tamaasa oktobarimi marlunngorneq siulleq Kalaallit Nipilersugaasa Ullorisassavaat.
