Irene Jeppson 2021-miilli Namminersorlutik Oqartussani attaveqaqatigiinnermut pisortatut atorfeqartoq KNR-imi niutaarsiassaqartitsivimmi pisortanngussaaq.

KNR-ip pisortaa, Annga Lynge, taama paasissutissiivoq. Tusagassiortutut ilinniarsimasup Irene Jeppsonip toqqarneqarnerani oqartussaaqatigiinnermik, nutaarsiassiisarnermik tusagassiornerlu ataatsimut isigalugu soqutigisaqarluarnera tunngavigineqarpoq.

- Irene Jeppsonip tusagassiuutit ineriartornerannik malinnaalluarnera oqaloqatigisarnerani ersarippoq, taamaalillunilu KNR-ip atuisartuminut anngussilluarsinnaanerulernissaanut nutaarsiassaqartitsiviup qanoq ineriartortinneqarsinnaaneranut isumassarsianik pitsaasorpassuarnik aamma peqarluni, Annga Lynge oqarpoq.

Nutaarsiassaqartitsivik isumassorneqassaaq

Annga Lyngep aamma paasissutissiissutigaa Irene Jeppson toqqarneqarnera suliatigut piginnaaneqarfigisaanik tunngaveqaannarani aamma nutaarsiassaqartitsiviup maannakkorpiaq inissisimaneranik paasisimasaqarluarneranik pissuteqartoq, sulisut pigiinnarnissaannut sulisussanillu pissarsiornissamut sulisunik isumassuinissaq pisariaqartinneqarluni.

- Isumaqarpunga Irene Jeppson piffissap aalassassimaarfiusup kingorna isumassuinissamik nutaarsiassaqartitsiviup pisariaqartitaanik tunniussaqarsinnaasoq. Irene pilersaarusiukkamik aqutsinermut aammalu sullivimmi atuakkat peqqinnartuullutillu ineriartorfiusinnaanissaasa pingaaruteqassusiannut paasisimasaqarluartuuvoq, Annga Lynge oqarpoq.

Irene Jeppson Sermitsiami AG-milu tusagassiortutut ukiut aqqaneq marluk sinnerlugit misilittagaqarpoq, aammalu Arnanut-mi aaqqissuisuusimalluni. 2010-miilli suliffeqarfissuarni attaveqaqatigiinnermik suliaqarsimavoq, ukiunilu kingullerni arfinilinni pisortatut atorfeqarsimalluni.

Irene Jeppson KNR-ip nutaarsiassaqartitsiviani sulilernissaminut qilanaarpoq.

- Nutaarsiassaqartitsivimmi pisortatut suliassarpassuaqarpoq sulilernissannullu qilanaarpunga. Aaqqissuisoqarfinni sulisut pikkorissut peqatigalugit innuttaasunut nutaarsiassaqartitsinissaq siunnerfilimmik sulissutigissavarput. Suliassap pingaartup kivitseqataaffiginissaanut KNR-illu innuttaasunik kiffartuussivittut akisussaaffimminik naammassinnittuarnissaata suleqataaffiginissaanut qilanaarpunga, Irene Jeppson oqarpoq.