Internetsikkut toqqaannartumik Unnuk qinersivik KNR1 aamma KNR2 aqqutigalugit aallakaatinneqarmat immikkoorlutik nalunaarsukkat 48.252-it isiginnaarsimapput. Kisitsit taanna Nuummi mittarfittaap 28. novembari 2024 ammarneqarneranut atasumik rekordiliinermi 29.531-nik isiginnaartulimmit anneroqaaq.

Taama amerlatigisut isiginnaarusussimanerisa takutippaa qinersineq taannarpiaq nunatsinniit nunanillu allaniit qanoq soqutigineqarsimatiginersoq. Aamma tassuunakkut erserpoq inuiaqatigiinnut kalaallinut KNR-ip pingaaruteqassusia, ingammik inuit oqartussaaqataanerannut pingaarutilimmik pisoqartillugu.

Aallakaatitat nammineq toqqakkat ilanngullugit marsip 11-anni 61.286-inik isiginnaartoqarpoq. Assi © : KNR

Nunatta KNR katersuuffigisarpaa

Isiginnaartut ilarpassuisa katersuullutik KNR-i malinnaavigisarpaat Smart TV aqqutigalugu, taamaattumik inuit isiginnaarsimasut amerlassusaat qaffasinneroriaannaavoq. Taassuma qaavatiguttaaq KNR-ip sakkortusaaviit qangatoortut aqqutigalugit takuneqarsinnaanera aamma eqqarsaatigineqassaaq. Taamaattumik qularnanngilaq qinersinerup unnukkuani KNR-ip allakaatitsineranik streamerisimasut kisinneqarsinnaasut 48.252-it saniatigut amerlanerujussuit aamma isiginnaarsimanissaat.

KNR-imi qullersat nuannaarutigaat innuttaasut taama amerlatigisut soqutiginnillutik malinnaanermikkut uppernarsarmassuk, tusagassiortut soqutiginartunik innuttaasunut ingerlatitseqqiisarnerat qanoq iluarineqartigisoq.

KNR-imi sulisut nersugassaapput

Torrallatap taamaattup tunuliaqutsiisorai KNR-imi sulisut suliaminnut tunniusimalluartut. Taakkuupput ilungersorlutik qinersinerup ingerlasimanerata pitsaasumik malinnaavigineqarsinnaaneranik piviusunngortitsisut. Tamannaavorlu KNR-ip innuttaasunik kiffartuussisussaatitaanermigut tusagassiuinikkut suliassaa pingaartoq: Innuttaasut oqartussaaqataasut politikkikkut pisunut isertuaatsumik soqutiginartumillu malinnaatinnissaat.

Marlunngorneq marsip 11-anni KNR1 toqqaannartumik aallakaatitsisoq 37.247-nik isiginnaartoqartoq, KNR2-lu toqqaannartumik danskisuumut nutsigaq 11.005-inik isiginnaartoqarluni. Katillutik 48.252 Assi © : KNR

Isiginnaarsimasunik rekordip taamaattup takutiinnanngilaa qinersinerup soqutigineqarnerujussua, aammali takutippaa KNR-imi sulisut – tusagassiortut teknikerillu – qanoq pitsaatigisumik qinersinermit aallakaatitsisimanersut.

KNR-ip siunissami politikkikkut pisunit tusagassiisarnini piorsaavigiuassavaa, taamaaliornermigut inuiaqatigiinnut pingaaruteqarnerpaat ajunnginnerpaamik tamanut siammarneqarsinnaaniassammata.