Savalimmiormiut: Kalaallit nalunnginnerusariaqarpagut
![](/sites/default/files/styles/image_934x467/public/article_images/536824546_e08b188f69_b.jpg?itok=vsmCFhV9)
Naalagaaffeqatigiiusugut immitsinnut ilisarisimanngippallaarpugut.
Danmarkimi statsministeri Lars Løkke Rasmussen, Savalimmiuni Lagmand Aksel V. Johannesen Naalakkersuisullu siulittaasuat Kim Kielsen naalagaaffeqatigiinneq pillugu Savalimmiuni ataasinngormat ataatsimiinnerminnit taama nalunaaruteqarput.
Politikerit ataatsimiinnerminni nunat pingasut akimorlugit piorsarsimassuserminnik oqaluttuarisaanerminnillu ilisimasaqarnerulernissamik suleqatigiissuteqarniarlutik isumaqatigiissutigaat.
AAMMA ATUARUK Naalagaaffeqatigiinnermut qaammasaqarnerulerneq, kiffaanngissuseqarneruneq Færingehavnimilu saliinissaq
- Naalagaaffeqatigiinneq naalagaaffeqatigiinnerullu siunissaa qanorluunniit isumaqarfigigaluaraanni oqaluttuarisaaneq ataatsimoorupparput immitsinnullu qanittuuvugut. Taakkualu qanorluunniit pisoqaraluarpat attatiinnasavagut, Lars Løkke Rasmussen naalagaaffeqatigiinneq pillugu ataatsimiinnerup kingorna tusagassiortunik katersortitsinermi oqarpoq.
Savalimmiormiut: Kalaallinut ilisimasat killeqartut
Imminut qaninnerusumik isiginissamut peqqutissaqarluartoqartoq, Thorshavnimi innuttaasut aqqusinermi naapitat isumaqarput.
Savalimmiormiup ilinniartitsisunngorniartup, Ragnhild Damip naalagaaffeqatigiinneq ajunngitsumik kinguneqartussatut isumaliutaasoraa. Ukkatarinninnerli Savalimmiut Danmarkillu akornanni pissutsinut tunnganerusoraa.
- Ilumuuissaguma Kalaallit Nunaannut unngatillugu ilisimasaqarpallaanngilanga. Isumaqarpunga Danmarkimut tunngatillugu tusagaqarnerusartugut. Misigisimavungali Kalaallit Nunaannut aamma atassuteqaateqartuusugut, Ragnhild Dam KNR-imut oqarpoq.
Ragnhild Dam naapertorlugu Savalimmiut nunarpullu ’umiatsiami ataatsimoorput’, tassa innuttaasukitsumiipput Atlantikullu Avannaani immikkut inissisimallutik. Taamaakkaluartorli savalimmiormiut kalaallit pillugit ilisimannippallaanngissorai.
- Naluara. Imaassinnaavoq Kalaallit Nunaat Danmarkimit sangiinnerusutut isigineqartartoq, immaqalu (Kalaallit Nunaannut tunngatillugu aaqq.) tusartakkat ajortut amerlavallaarput. Tamanna pakatsinartuusoraara, taamaassorinngilarami. Kisianni imaassinnaavoq Danmarkip Kalaallit Nunaanniit politikkikkut pitsaanerussuteqarnini iluaqutigigaa.
Aalisarneq utoqqarnut attaveqartitsisoq – nipilersuutit inuusuttut ajornanni
Aalisarnermik inuussutissarsiorneq kalaallit savalimmiormiullu akornanni ukiorpassuarni attaveqaateqartitsisuuvoq. Tamannalu innuttaasut akornanni ilisimasanik pilersitseqataasut ilagigaat, Kristian Magnussen Thorshavnimi inunnik isumaginnittutut sulisoq isumaqarpoq.
Taamaakkaluartorli aalisarnermik inuussutissarsiuteqarnerup avataatigut Kalaallit Nunaata ilisimasaqarfiginissaanut nunat imarpimmit akunneqarlutik imminnut ungasinnerat aporfiusoraa.
- Kalaallit Nunaannut tunngatillugu ilisimasaqarpallaanngilanga. Ilisimasama annerpaartaat soorunami savalimmiormiunit aalisartunit Kalaallit Nunaanni aalisarsimasuneerput aammali Kalaallit Nunaanni najugaqarsimasunik ilisarisimasaqarpunga. Uangali nammineq tikissimanngilara, taamaammat ilisimasakippunga (...). Imaaliallaannaq orninneqarsinnaasuunngilaq. Akisuvoq immaqalu pisariulluni, Kristian Magnussen oqarpoq.
Kristian Magnussenip politikerit kunngeqarfimmi innuttaasut pingasut akornerminni ilisimasaqarnerulernissaannik pilersaaruteqarnerat taperserpaa. Atuartut nunamut paasisassarsiorlutik angalaneri paarlaasseqatigiinnikkullu tikeraarnerit amerlanerusinnaasut taassuma oqaatigaa, erseqqissaatigaali tamanna ukiuni arlalinni oqaluuserineqartarsimasoq amerlanertigulli politikkikkut oqaluuserisaaginnartarnerarlugu.
- Kalaallit Nunaanni, Savalimmiuni Danmarkimilu inuusuttut assigiinngitsutigut imminnut tikeraartarnissaannut aningaasanik immikkoortitsisoqarsinnaavoq. Ajornaatsunngortinnissaali apeqqutaaginnarunarpoq. Tamannali arlaleriarlugu oqaluuserineqareernikuuvoq, Kristian Magnussen oqarpoq.
Thorshavnip aqquserngani naapitatta amerlasuut nipilersornerit, isiginnaartitsinerit eqqumiitsulioriaatsillu allat kalaallit savalimmiormiullu akornanni ikinngutigiinnernik nutaanik pilersitsisarneranut ilaasut eqqaavaat.
Taamatullumi ikinngutigiilernit amerlanerusariaqartut, soraarneq Karl Johannesen Savalimmiut qeqertaasa kujallersaata Suðuroyip illoqarfianiTvøroyriulluinnarni najugaqartoq isumaqarpoq.
- Danskit, savalimmiormiut kalaallillu inuiattut ataatsitut oqaatigineqarsinnaangajassoraakka. Kalaallinik amerlasuunik Savalimmiuni najugaqartunik ilisarisimasaqarpunga, taakkulu inutsialarujussuupput – danskillumi aamma, KNR-imut qungujulluni oqarpoq.