Mette Frederiksen: Kalaallit inuusuttut tikilluaqqunerusariaqarpagut

- Nalunngisassitut Kalaallit Nunaanneersuunngilanga, Illoqarfiup ilaani Kalaallit Nunaannit taaguusersukkameersuuvunga.

Socialdemokratiip siulittaasua, Mette Frederiksen, kalaallit Aalborg Zoomi sisamanngornermi inuiattut ullorsiorneranni taama oqarpoq.

Taama oqarnermigut Aalborgip kangia tungaani, aqqusernit nunatsinni sumiiffinnit assigiinngitsunit inunnillu nunatsinnut attuumassuteqartunit atsersorneqarfianni, alliartorsimanini eqqaasitsissutigaa. Nunatsinneersuunngikkaluarlunilu, nunatsinnut atassuteqartutut misiginini erseqqissarpaa.

Minnerunngitsumik Nunatsinni ukiut marluk matuma siornatigut angalareernermini, ilaatigut Danmarki nunattalu assigiinngissutaannik ilisimasaqarfigilikkamini.

AAMMA ATUARUK Kalaallit Nunaata naalagaaffiinngornissaa Mette Frederiksenip tapersersorpaa

- Kalaallit Nunaanniit Danmarkiliarneq qanoq sapiitsuliornerutigisoq, Kalaallit Nunaanneereerninni eqqarsaatiginngitsoorsinnaanngilara. Aamma inupparujussuarnut qanoq ajornartigisimassasoq, Mette Frederiksen oqarpoq.

Kalaallit inuusuttut pillugit qaninnerusumik suleqatigiinneq

Taanna naapertorlugu ingammik kalaallit inuusuttut ilinniariarlutik Danmarkimut nuukkaagamik ajornartorsiortarput. 

- Oqaloqatiginneqattaareerlunga eqqarsalerpunga Danmarkimut tikittoqaraangat, tikilluaqusillaqittuaannartuunngitsugut. Kalaalerpassussappummi ilinniartunut inissiani kisimiileraangamik, aallaqqaataaniit aallartinnialullutik, misigilersartut kiserliorlutik, Mette Frederiksen oqarpoq.

AAMMA ATUARUK Dansk er ikke et krav for at komme på efterskole i Danmark

Kalaallinulli inuusuttunut Danmarkimiittunut inuuneq qanoq pitsaanerulersinnaanersoq, erseqqissumik akinngilaa, ilinniarfeqarfiit, kalaallit illuisa inuillu kajumissutsimik tunngaveqartumik ikiuuttut suleqatigiinnissaa eqqaatsiaannarlugu.

- Inersimasuusugut tamatta meerartatta inuusuttortattalu ilinniagaqarnissaasa pingaartiginera nalunnginnatsigu, taava uagutsinnut neriorsorta, maanngaanniit iliuusissarput tassaasoq, inuusuttunut sapiiseqalutik Kalaallit nunaannik qimatsisunut tikilluaqqusilluarnissaq.