Kalaallit inuusuttut angerlarsimaffeqanngitsut amerlipput
Taamaattumik Aalborg kommunip Kalaallillu Illutaata Nunatsinni kommunit kajumissaarpaat, nuunnermi paasissutissanik pitsaanernik paasisitsiniaanissaannik.
Taakkulu kommunit Nunatsinniittut kajumissaarpaat nuunniartunut paasititsiniaanertik annertusaqqullugu.
Aalborgimi kalaallimik inuusuttumik angerlarsimaffeqanngitsumik naapitseriataarnissamut periarfissat annertusiartorput, Aalborgip kommuniani Kalaallinik sullissivimmi pisortaq Jeppe Bülow Sørensen taama oqaluttuarpoq.
- Uissuumminartorsuunngilaq, Aalborgimi kalaallimik inuusuttumik angerlasimaffeqanngitsumik naapitsigaanni. Imaassinnaavoq Aalborgimi ataatsimut isigalugu ukiut pingasut-sisamat-tallimat matuma siornamut naleqqiullugu maannakkut kalaaleqarnerusoq.
Kommunip Angerlasimaffinni- aqqusinermilu sulisuisa naatsorsuutaasa ersersippaat, siorna decembarimiit ukioq manna marsimut Aalborgip kommuniani inuusuttut angerlarsimaffeqanngitsut 18-it 30-illu akornanni ukiullit 98-iusimasut.
Taakkunannga kalaallinit kingoqqisut 23 procentiupput, imaappoq sisamaangaangasa ataaseq inuusuttuuvoq kalaaleq angerlasimaffeqanngitsoq.
Angerlarsimaffeqanngitsut amerlanersaat imigassamik aanngajaarniutinillu ajornartorsiuteqartuupput, ikittuinnaat naliginnarnik ajornartorsiuteqartuullutik.
Naatsorsuinerit ersersippaat angerlarsimaffeqanngitsut pingasuungaangasa ataaseq meeraanermini angerlarsimaffiup avataanut inissinneqarsimasuusartoq.
- Danmarkimi najugaqassagaanni suut piumasaqaataanersut ilisimaneqartuaannanngillat. Angerlarsimaffissamik nassaareersimasariaqarpoq, Danmarkimilu suliffeqarfeqarfiit allaallutik, Danmarkimi ilinniagaqarniaraanni suliffittaarluniluuniit danskisut oqallorissuusariaqartoq, Jeppe Bülow Sørensen oqarpoq.
Kalaallit illuutaanni Aalborgimiittumi pisut ilisarineqarput. Taakku misigisimapput kalaallit inuusuttut illoqarfimmut nuukkaangasa kommuni peqatigalugu sapinngisartik tamaat atorlugu inissarsiuussisarlutik.
Kommunit Nunatsinniittut kajumissaarneqarput danskit aaqqissuussaanerat pillugu paasissutissiisarneroqqullugit:
- Danmarkimut nuunnermi suut eqiingaffigisariaqarpat - adressep allanngortinnissaa, aningaaserivimmut tunngasut NemID, Nemkonto paasissutissallu allat. Innuttaasutut suut pisinnaatitaaffigaavut, suullu pisussaaffigaavut. Nuunnermi iliuusissanut tunngasut tamakku tassaapput Jyllandip avannaanut nuunnermi aallaaviusariaqartut.
Kalaallit illuutaanni Aalborgimiittumi pisortap tullia Peter Christensen naggasiivoq.
Aalborgip Kommuniata aqqusinermi sullissisussat amerlisimavai, illuutileqatigiiffiillu amerlanerusut inissanik akikinnerusunik amerlanerusunillu attartugassiinissaat kajumissaarutigisimallugu.
