Kalaallit Illuutaasa peqataatitsiniarneq ima pitsanngorsarniarpaat
Kalaallit Illuutaasa peqataatitsiniarnermut suliniutaannut 2015-imi aningaasaliissutigineqartut katillugit 4 millionit koruuniusut danskit isumaginninnermut ministereqarfiannut qinnuteqaatiginissaannut killiliussaq qaangiutereerpoq.
Kalaallit Illuutaat peqatigiillutik aalajangersimapput suliniutinut assigiinngitsunut tamarmik immikkut 1 millionit koruuninik qinnuteqaateqarniarlutik.
Tamatuma saniatigut Kalaallit Illuutaanni pisortat isumaqatigiissutigaat kalaallit Danmarkimut nuuttut ataatsimoortumik nalunaarsuiffiliuunnissaannut aammalu Danmarkimut nuunnginnermi Danmarkimi pissutsit pillugit paasissutissiiffiusumik ataatsimoortumik nittartagaliornissamut tamarmik immikkut 200.000 koruuninik aningaasaliiniarlutik - tassalu katillugit 800.000 koruuninik.
Aamma atuaruk Kalaallit Illuutaat nuuttunik nalunaarsuiniartut
Kalaallit Illuutaasa namminneq suliniutigisaat tassaapput:
Kalaallit Illuutaat Københavnimiittoq:
- Tapersersorteqartitsilluni aaqqissuussinerup "Ilik"-up annertusarnissaa. Kalaallit Københavnimut eqqaanullu nooqqammertut qanimut tapersersorneqarnissaannut namminneq kajumissutsiminnik sulerusuttut amerlanerusut pissarsiariniarneqassapput
- Sullivik sammisassaqartitsiviullunilu suliassaqartitsiviusoq "Qiperoq" inuussutissarsiornermut sammiveqarnerusunngortillugu nukittorsarneqassaaq, atuisut amerlanerusut suliffeqalernissaminnut periarfissaat pitsanngorsarniarlugit
Kalaallit Illuutaat Aarhusimiittoq:
- Randersimi allaffimmik siunnersuisarfimmik aallartisaasoqassaaq - Randersip Kommuniani ornittagaq "Perron 4" suleqatigineqarluni
- Viborgimi allaffik siunnersuisarfik pioreersoq annertusaavigineqassaaq
- Inummut ataatsimut tarnip pissusianik ilisimasalimmik oqaloqatiginninnerit tallimat tikillugit neqerooruteqassaaq
Kalaallit Illuutaat Aalborgimiittoq:
- Jyllandip avannaani kalaallinut inuusuttunut suliniut marlunnut avinneqarsimavoq:
- Kiserliornerup pitsaaliornissaa siunertaralugu ilaatigullu aamma ilinniakkamik aallartitsinissamut ingerlatsiinnarnissamulluunniit kajumilersitsinissaq anguniarlugu attaveqaqatigiinnik pilersitsinissamik suliniut
- Ajornartorsiutit aaqqinniagassat pillugit eqimattanik oqaloqatigiittarfinnik neqerooruteqarnissaq - soorlu angutit oqaloqatigiittarfissaannik, kamannermik aqutsinissamik sammisaqarfiusumik allatigulluunniit misigisimasanik kingunerlutsitsisunut
Kalaallit Illuutaat Odensemiittoq:
- Marluinnik oqaasilimmik suliniutinik suliaqartussamik atorfinitsitsineq
- Kommunit suleqatigalugit nooqqammertut immikkut isiginiarlugit siunnerfeqartumik suliniuteqarnissaq
Qinnuteqaatit oktobarip qiteqqunnerani akissuteqarfiginissaat danskit isumaginnermut ministereqarfiata naatsorsuutigaa.
Najoqqutarisat: Kalaallit Illuutaat