Kalaallit Illuutaanni pisortaq nutaaq: Jyllandip Avannaata Kalaallillu Nunaata assigiissutaat nuuttunut iluaqutaassapput
Imaq ammaannaartoq, sineriak, aalisarneq, inuit nipaatsut inoroorsaallaqqissullu.
Kalaallit Nunaat Jyllandillu Avannaa assigiissuteqaqaat. Immaqa tamanna pissutigalugu Jyllandip Avannaa ukiorpassuarni Danmarkimi nunap ilaa kalaallit nuuttut amerlanerit nuuffigisarpaat, inuit tassani najugallit amerlassusaannut naleqqiullugit.
Taakkulu ilagaat Anna Lynge, Jyllandip Avannaani ukiut 20 sinnerlugit najugaqarsimasoq. Taanna Januaarip aappaani Aalborgimi Kalaallit Illuuutaanni pisortatut atuutilissaaq, namminerlu illumik taassuminnga atuilluartuuvoq.
Ilisaritillugu: Anna Lynge
Ukioq inuuffik 1973
Narsami inuuvoq, annertunerusumik Nuummi alliartorpoq
Pania 21-nik ukioqarpoq, ernera 17-inik, inooqatigaa Poul.
Danmarkimi Hjørring Seminariumimit ilinniartitsisutut naammassisimavoq
Ilaatigut suliffigisimavai Ranum Efterskole Jyllandip Avannaanii aamma Aalborgs uddannelsescenter for teenagere, Ung AUC.
Ukiut ingerlaneranni Jyllandip Avannaani kalaallit peqatigiiffiini arlaqartuni sullissisarsimavoq, Aalborgimi Kalaallit Illuutaanni siulersuisunut siulittaasuusimavoq aamma Aalborg Kommunes Integrationsråd-iani ilaasortaavoq.
- Ukiorpassuarni Kalaallit Illuutaannut attaveqarpunga. Taamaattumik – sivisuumik eqqaarsareerlunga – pissusissamisoorsoraara atorfik qinnutigigakku, isumaqarama piginnaasakka tassunga naleqquttut, Anna Lynge KNR-imut oqarpoq.
Piginnaasanut taakununnga ilaavoq ilaatigut ukiuni qulikkaani arlalinni Jyllandip Avannaani kallaalit peqatigiiffiinut suleqataasimanera. Tunniiusimaneq taanna taassaanerarpaa 'inuttut pisussaafik'.
illumut pisortaaffigilikkaminut siulersuisunut siulitaassuuvoq, soorlu aamma i Aalborg Kommunes Integrationsråd-ia ilaasortaaffigigaa.
Jyllandip Avannaa kalaallinut tulluarpoq
Anna Lynge Kujataani Narsami inuuvoq meeraanermilu annersaa anaanami inunngorfia Nuuk najorpaa. Uummaannaq aamma Australia aamma najugaqarfigai, Nordjyllandimi Hjørringimi ilinniartitsisutut ilinnialersinnani.
Ukiut kingulliit aqqanillit Aalborgimi najugaqarpoq ilinnniarfiillu assigiinngitsut suliffigai, ilaatigut Ranum Efterskole, ukiut tamassaa kalaallinik arlalinnik ilinniartoqartartoq.
AAMMA ATUARUK Anna Lynge er ny direktør i Det Grønlandske Hus i Aalborg
Isumaa malillugu Jyllandip Avannaa 'immikoorluinnaq piginnaaneqarpoq', ilaatigut nunap qanoq issusaa peqqutigalugu.
- Immamut qanittuuvoq, soorlu peroriartorfitsinni. Taamaattumillu pissusissamisoorpoq Aalborgip qeqqanut nuunnissaq, aamma angallannermut tamanit atorneqarsinnaasumut ilaasinnaanissaq Kattegatimut imaluunniit Vesterhavemut.
Ilaatigullu Jyllandip Avannaa kalaallinut ilinniagaqarniartunut imaluunnit suliartortunut tulluartuuvoq.
- Jyllandip Avanaa illinniarfissanik neqerooruteqaqaaq ilinniaqqinnissaq sumiiffimmilu nutaami inuiaqatigiinnut ilanngunniarneq eqqarsaatigalugu. Jyllandillu Avnaannaamiui inunnut allamiunut tikilluaqqusillaqqeqaat, Anna Lynge oqarpoq.
Kalallillu inuiaqatigiinnut danskinut ilanngutitinnissaannut ikiuinissamik pisariaqartitsineq annertusiartortoq, Anna Lynge isumaqarpoq. Tamatumunnga aqqutissat ilagaat Kalaallit Nunaat mutiusoq ilinniarfinnut suliffinnullu ilisaritissallugu – unaanngitsoq 'Kalaallit Nunaat pillugu isuma pigiliussaq'.
- Takorloorpara kalaallit massakkut kulturiat takussaanerulersinniarlugu Issittullu suunera paasitissallugu. Taamaalillunga kissaatigaara Kalaallit Illuutaat Kalaallit Nunaata ersinnerulernissaanut atorneqarnerulersinnaanissaa, Anna Lynge oqarpoq.
Aamma kalaallit ukiorpassuarni Danmarkimi najugaqarsimasut nunami pitsaanerusumik inuunissaminnut ikiorneqarnissamik pisariaqartitsipput.
- Danmarkimi kalaaliulluni suut iluaqutaanersut suullu ajoqutaanersut eqqumaffiginerusariaqarpoq, Anna Lynge oqarpoq.
Illup nuunneqarnissaa eqqarsaatigaa
Danmarkimi Kallaallit Illuutaat arlaqaqisunik pisussaaffeqarput, ilaatigut inunnik siunnersuinermik, ilinniarnermi siunnersuinermik aamma kulturikkut ingerlatitseqqinnermik, soorlu aamma Aalborgimi illu Kalaallit Nunaata inuiattut ullorsiornerani isumaginneqataasartoq.
Tamakku tamarmik soorunami nangineqassapput, Anna Lynge erseqqissaavoq. Iluarissagaluaqaa inunnut imaaliinnarlutik takkuttunut atoruminarnerulissasoq. Massakkummi ajornakusoormat, isumaqarpoq.
Kalaallit Illuutaata Aalborgimi qitiusumik inissisimanera angallassissutinullu tamanit atorneqarsinnaasunut qanikkaluaqaaq. Kisianni illu pingasunik qulereeqarpoq elevatoreqarnani, tamanna atuisunut utoqqaanerusunut unammillernaqaaq.
Pingaartumik igaffimmut 2.salimiittumut neriartortunut.
Ilutigalugulu isikkivia naammaannaqaluni aqqusinermut angallaffioqalunilu nipiliorfioqisumut.
Taamaattumik Anna Lyngep sivisujaamik eqqarsaatigisimavaa illu pitsaanerusumik inissinneqarsinnaasoq.
- Immamut isikkivilimmi inunngorsimavugut sungiusimallugulu. Kalaalerpassuarnullu kangerluk qanissallugu pilerinaqaaq. Taamaattumik tulluartuussaaq Limfjordep qanittuaniittumik illutaarsinnaagaanni. Soorunami ungasissumut isigineruvoq, kisianni tamaviaarunniarpara, Anna Lynge oqarpoq.
Aalborgimi Kalallit Illuutaanni pisortatut atorfik Anna Lyngep tigussavaa Bo Albrechtsen, ukiut sisamat pisortaareerluni Nunatsinnut utertoq, taarserlugu.
