Aalborg Københavnilu: Kalaallit ilinniartut inissaat 35-t piariilersut
Aasaaru feeriareerlutit Aalborgimut ilinniariarniarlutit pilersaaruteqaruit, taava tappavani ilinniarninni inissannik maannangaaq qinnuteqareersinnaavutit.
Ilinniartunummi inissat qulit nunatsinniit Jyllandip avannaani illoqarfiit pingaarnersaannut ukioq siulleq ilinniariartunut aasarumiit piareersimasussatut inniminnerneqarput.
Aalborgimi ilinniartunut inissiat amigaataanngikkaluarput, inissialli nutaat kalaallit ilinnialerlaat illoqarfimmut inuiaqatigiinnullu nutaanut pineranni iluaqutaasinnaapput.
Aalborgimi Kalaallit Illuutaanni pisortaq Anna Lynge KNR-imut oqarpoq.
- Periarfissaq kalaallinut ilinniartunut kalaallillu akornanniikkusuttunut tulluartuuvoq. Kalaallillu ilagalugit ataatsimoorfeqarsinnaanissamut periarfissaqarnerussaaq.
Kalaallit Danmarkimi ilinniartut amerlasuut angerlarsernertik kiserliornertillu pissutigalugit ilinniarnertik unitsiinnartarpaat.
Ingerlaqqillutik ukioq siulleq ilinniartut nunatsinneersut 15-it Aalborgimut attuumassuteqarlutik maanna ilinniartuupput, nunatsinneersullu 55-it ukioq ataatsimiit sivisunerusumik ilinniarnerminnik illoqarfimmi ingerlataqartuullutik. Taakku sumi tamaani Aalborgimi namminneq attartugaqanngikkunik kollegianiittarput Jyllandilluunniit avannaani illoqarfinni minnerni inissianiillutik.
Danskit aningaasanut inatsisaata inissiat qulakkeerai
Ilinniartunut inissiat Danmarkip ukioq manna aningaasanut inatsisaanit aningaasalerneqarput, kalaallimmi Aalborgimi Københavnimilu ukioq siulleq ilinniartut inissannut atugassat 6 millionit koruunit inatsimmi immikkoortinneqarput.
Ilinniartunut inissiat ataatsimik marlunnillu initallit Aalborgimi Idrætsbyenimiittut pineqarput, taakku Aalborgip illoqarfiata kangiatungaaniillutik.
Inissiat Himmerland Boligforeningimit attartortinneqarput, taakkununnungalu inissianut qinnuteqaatit Aalborgimi Kalaallit Illuutaannut nassiunneqassapput. Kikkut inissianik tunineqassanersut Kalaallit Illuuttaanni ilinniarnermut immikkoortortaqarfimmiit maannakkuugallartoq toqqarneqartassapput.
Kalaallilli ilinniartut inissamik tunineqartut ukioq ataaseq ilinniareerunik ilinniaqqinniarunillu inigisartik paariinnarsinnaassavaat, Aalborgimimi ilinniartunut inissiat maannakkut amigaataarujussuanngimmata.
- Ilinniartunut inissiat pineqartut ukiup ataatsip qaangiunnerani qimanneqartussaasuuppata amerlasuut qinnuteqarnavianngitsut ilimagaara. Nutsernermi qanoq akisutigalunilu ajoqutaasartigisoq tamatta nalunngilarput, taassumalu saniatigut inuiaqatigiinnut nutaanut tulluarsarfiussaaq, Anna Lynge oqarpoq.
Inissianut qulinut utaqqisunut allattorsimaffeqalissagaluarpat Aalborgimi Kalaallit Illuutaata taamaanikkussamut qanoq inissisimasoqarnera nalilersussavaa.
Københavnimi pisortaq: Allannguutaangaatsiassaaq
Aamma kalaallit ingerlaqqillutik Københavnimi ilinnialerlaat inissaqalernissaat periarfissaalissasoq ilimanarluinnarpoq.
Tamannali aappaagu aasakkut aatsaat pisinnaassaaq, ilinniartunummi inissiat nutaat 25-t Frederiksbergimi piareertussatut naatsorsuutigineqarpoq.
Housing Foundation Fond tamatumani suleqatigineqarpoq, nunaniimmi allaneersut Danmarkimi illoqarfiit pingaarnersaannut ilinniariartut inissaqarnissaat taassuma aningaasateqarfiup suliaraa.
Isumaqatigiissulli suli piariinngilaq, ungasinngitsumili piareernissaa Københavnimi Kalaallit Illuutaanni pisortap Leise Johnsenip ilimagaa.
- København ilinniariarfissatut pilerigineqarnersaavoq, tamaanili inissarsinissaq ajornarnersaalluni. Inissianulli 25-nut aningaasassaqalerneq allannguutaangaatsiassaaq, taanna KNR-imut oqarpoq.
