Kalaallit eqqumiitsuliortut qulit Art Copenhagen peqataaffigileraat
Eqqumiitsuliortut nunatsinneersut qulit eqqumiitsulianik nittarsaassinersuarmut Art Copenhagenimut Københavnimi Bella Centerimi ingerlanneqartussamut ukioq manna peqataasussanngorput.
Allattoq Simon Uldum -
aggustip 11-at 2016 10:12
Kalaallit ukiuni kingullerni arfineq-marlunni siullerpaamik nittarsaassinersuarmi ataatsimoorlutik saqqummersitsiveqassapput. Eqqumiitsuliortut qulit peqatigiillutik saqqummersitsivik kvadratmeterinik 52-inik angitigisoq suliaminnik saqqummersitsivigissavaat. Kalaalit Illuutaat Københavnimiittoq tusagassiorfinnut nalunaaruteqarluni taama allappoq.
Eqqumiitsuliortut tassaapput: Naja Rosing-Asvid, Lisbeth Karline Poulsen, Ivan Burkal, Ivínguak' Stork Høegh, Julia Pars, Buuti Petersen, Sissi Møller, Kristine Spore Kreutzmann, Gukki Nuka aamma Lars Møller.
Art Copenhagen Bella Centerimi aggustip 26-anit 28-anut ingerlanneqassaaq. Eqqumiitsulianik nittarsaassisarnerit Skandiaviani anginersaraat ukioq mannalu ukiunik 20-nngortorsiorluni.
