Kalaallit Atuakkiortut: Inuusuttut oqaaseqartartoqalerput
![](/sites/default/files/styles/image_934x467/public/voxpop_genlukning_anp_still_1.jpg?itok=czrmlBOz)
Nunat Avannarliit Siunnersuisoqatigiivisa atuakkiortumut nersornaasiuttagaannik kalaallimut atuakkiortumut siullerpaamik nersornaasiisoqarpoq. Tamanna pivoq Niviaq Korneliussenip atuakkiaa 'Naasuliartarpi' marlunngornermi nersornaatisimmat.
Kalaallit Atuakkiortut siulittaasuata, Juaaka Lyberthip, qularutiginngilaa Nunat Avannarliit Siunnersuisoqatigiivisa atuakkiortumut nersornaasiuttagaannik Niviaq Korneliussenip nersornaaserneqarnera nunarsuarmioqatigiit kalaallit atuakkiaannut soqutiginninnerulernerannik malitseqarsinnaasoq.
AAMMA ATUARUK Niviaq Korneliussen Nunat Avannarliit Siunnersuisoqatigiivisa atuakkiortumut nersornaasiuttagaannik tunineqartoq
Niviaq Korneliussen
- Nuummi 1990-imi inunngorpoq Nanortalimmilu peroriartorluni.
- Niviaq Korneliussenip atuakkiortortutut sulinera aallartippoq 2013-imi Allatta!-mi oqaluttuaaraliornermut unammisitsinermi ajugaagami.
- Ukioq ataaseq qaangiummat atuakkiaqqaata HOMO sapienne kalaallisut qallunaatullu saqqummerpoq.
- HOMO sapienne Nunat Avannarliit Siunnersuisoqatigiivisa atuakkiortumut nersornaasiuttagaanut 2015-imi innersuunneqarpoq, tamatuma kingorna oqaatsit qulit sinnerlugit nutserneqarnikuuvoq, isiginnaartitsissusiaalluni aamma filmiliarineqartussaalluni.
- Atuakkiami aappaa 'Naasuliardarfi' 2020-mi saqqumminnginnerani Niviaq Korneliussenip isiginnaartitsissut Angutivik malitassiorpaa.
Tusarfik: Milik Publishing.
- Nunatsinni oqarsinnaalerpugut atuakkiortoqartugut nunarsuatsinni atuakkiullaqqissorsuit ilaattut taasinnaasatsinnik. Taanna ilisimareeraluarparput. Massakkulli soorlu Niviaq Korneliussenip nersornaaserneqarneratigut uppernarsigipput. Tassa Nunat Avannarliit atuakkiortunut nersornaasiuttagaat nunarsuatsinni nersornaatit nuimanerpaat ilagimmassuk, Juaaka Lyberth oqarpoq.
Juaaka Lyberthip aamma ilimagivaa Nunat Avannarliit Siunnersuisoqatigiivisa atuakkiortumut nersornaasiuttagaannik kalaallimut atuakkiortumut nersornaasiineq inuusuttunut atuakkiortunngorusuttunut qiimmassattaajumaartoq.
- Neriuppunga atuakkiorusuttorpassuit, inuusuttut maligassiuisutut qummut isigisaqarsinnaaleramik, allaat Nordisk Litteraturprisimik Nunatsinniit pinnattoqarsinnaasoq, taanna iluaqutigilluarsinnaagaat, oqarpoq.
Oqalugiarnera attortissutigigaa
Niviaq Korneliussenip atuakkiaa, 'Naasuliardarpi', inuusuttut akornanni imminut toquttarnermut tunngasoq, oqaatsinut qulinut nutserneqarnikuuvoq.
- Kalaallit atuakkiaasa nunani allani soqutigineqarnerulernerannik malitseqartussaasoq qularinngilluinnarpara. Pingaartumik Niviaq Korneliussenip qallunaatut atuakkiaata, Gyldendaliminngaanniit saqqummersinneqarsimasup, soqutigineqarnerujussua qularnanngitsumik allissaaq. Aamma imaalluuarsinnaavoq oqaatsinut allanut nutserneqartoq, Juaaka Lyberth oqarpoq.
Milik Publishing Naasuliardarfimmik saqqummersitsisuuvoq.
AAMMA ATUARUK Niviaq appisaluussivoq: Oqalugiaataa attortinnartoq uani atuarsinnaavat
Niviaq Korneliussen Naalakkersuisut siulittaasuannit, Múte B. Egedemit, nersornaammik tunineqarami sakkortuumik qujassuteqarluni oqalugiarpoq. Juaaka Lyberthillu tamanna aamma attortissutigisimavaa.
- Minnerunngitsumik aamma oqaatigisariaqarpoq Niviaq Korneliussenip qujalluni oqaaseqarnermini oqalugiarfigimmagit atuakkiamini 'Naasuliardarfimmi' sammisani. Inuusuttut imminut toqussimasut imaluunniit imminut toqukkusullutik eqqarsaateqartarlutik ajornartorsiuteqartut. Taakkua inuusuttut Nunatsinni, ulluinnarni nalunngikkaluarlutigit eqqarsaatigivallaarneq ajukkagut, soorlulusooq avammut oqariartortartoqalersut, oqarpoq nangillunilu:
- Aamma Niviaq Korneliussenip oqalugiarnermini taammagu taakkua ajunngitsumik toqqissisimanartumillu inuuneqarnissaannut sorsuutiginninni ingerlatiinnarusullugu. Taamaattumik inuusuttut ajornartorsiuteqartartut Niviaq Korneliussenip nersornaaserneqarnerani soorlu oqaaseqartartoqalersutut oqaatigisinnaagigut.
AAMMA ATUARUK Atuakkiortut peqatigiiffiata nutaaliortumut Niviaq Korneliussenimut innersuussinerit nersualaarutigai
Oqalugiarnerani illit suna attortiffiginerpaaviuk?
- Oqaasii sakkortupput. Sakkortuupilussorujussuupput. Aamma aallaqqaasiilluni Naalakkersuisugut uparuarpai. Annernalaarunanngitsuunngitsumik. Oqarluni soorlulugooq matu matoqqasoq oqaluullugu pisortanut saaffiginnittaraangami.
- Kisianni oqalugiarnini inuusuttunut, inoorusussimagaluarlutik immaqa imminut toqussimasunut saatippaa. Inuusuttuarannguullutik, inuusuttuullutik immaqalu utoqqalilaarereerlutik imminut toqussimanngitsuugunik suli ullumikkumut inuusinnaangaluartunut. Taakkua soorlulusooq oqaatigiumasaallusooq oqaatigimmagit assorujussuaq killitsippunga qamuunalu aliatsallunga, naak aamma illuatungaani nersornaaserneqarmat nuannaartorujussuungaluarlunga.