Kalaallit atuakkiaasa ilaat Parisimi nittarsaanneqalertut
![](/sites/default/files/styles/image_934x467/public/2024-04/2P2A5959.jpg?itok=aovJSSYg)
Kalaallit atuakkiaat Parisimi Quebecimilu atuartartunut soqutigineqarnerulersinniarneqassapput.
Tassa Kalaallit Atuakkiortut ”Festival du Livre de Paris”-imik taasamik Frankrigimi sapaatit akunnerata tulliata naanerani atuakkialerilluni festivalimi peqataagunik taamaaliulersaarput.
- Siullermik kalaallit atuakkiaannik franskisuunngorteriikkanik saqqummiissaagut. Taakkua arlalissuupput. Taakkua pillugit aammali nunatsinni atuakkialerineq pillugu quppersagaliatsinnik aamma saqqummiissaagut, Kalaallit Atuakkiortut siulittaasuat Juaaka Lyberth oqarpoq nangillunilu:
- Attaveqarfigut aamma ataatsimeeqatigissavagut.
Danmarkip Parisimi aallartitaqarfiani kulturilerisoq immikkullu ilisimasalik Montreal Universitetimeersoq Kalaallit Atuakkiortut Frankrigip, Canadap nunattalu akornanni suleqatigiinnissamik isumaqatigiissusiornissamut atatillugu ataatsimeeqatigisassaannut ilaapput.
![](/sites/default/files/styles/image_934x467/public/2024-04/Image1.jpg?itok=dnldju6t)
Kalaallit atuakkiaasa Frankrigimi Canadamilu Quebecimi franskisut oqaaseqarfiusuni soqutigineqarnerulernissaat neriuutaavoq.
- Tassa Canadami Parisimilu franskisut oqaaseqarfiusuni nittarsaannissaat siunniupparput. Atuakkianimmi franskisuunngortereersimasunik taakkunani tuniniaanissarput periarfissanik nutaanik ammaassissaaq, Juaaka Lyberth oqarpoq.
Kalaallillu atuakkiaat franskisut atuartartunit soqutigineqartut, taanna oqarpoq.
- Qanoq soqutigineqartiginersut paasisassarsiorluta siorna Parisimiippugut. Aamma Frankrig nunarpullu – ingammik Tunulu- qangali attaveqarfigiipput. Tassa kalaallit atuakkiaat soqutigineqarput, soqutigineqarnerulersinniassavagulli.
Taamaammat ataasiaannarnatik atuakkialerilluni festivaleqataajumaarlutik, taassuma aamma neriuutigaa.
- Nunani allani nittarsaassinerulernerput periarfissanik nutaanik ammaassivoq. Allaat Danmarkip Parisimi aallartitaqarfiani immaqa aappaagu assigiinngitsunik aaqqissuussisinnaassaagut, kulturerpulluunniit pillugu atuagaateqarfinni saqqummiisinnaassagunarluta. Aamma kalaallit atuakkiaat amerlanerusut franskisuunngortinneqarsinnaanissaat aamma neriuutigeqaara.
![](/sites/default/files/styles/image_934x467/public/2024-04/Postkort%20af%20nogle%20af%20de%20udstillede%20b%C3%B8ger.png?h=b0e805c5&itok=DahYYoVe)