Kalaallit Arsaattartut Kattuffiata Narsami tunillatsissimasoqalereersoq unammiuaarsinnaanissartik ernumassutigaa

Nunatsinni virusimik januaarip qaammataanili tunillatsissimasoqarani tunillatsissimasumik ippassaq uppernarsaasoqaqqippoq.

Narsamimi coronamik tunillatsissimasumik uppernarsaasoqarpoq. Pineqartoq Københavnimi Kalaallit Peqqissartut Illuanniissimavoq, tunillatsissimallunilu angerlamut uterluni.

Tamanna arsartartut kattuffiata siulittaasuata, Finn Meinelip ernumaammissutigilaarpaa.

Nunatsinni kommunimit kommunimut allamut angalalluni aaqqissuussinernut peqataaniaraanni nalunaartoqarnissaanik pisariaqartunut peqataajartornissaq apriilip ulluisa 18-iata tungaanut periarfissaavoq. Taamaammat assersuutigalugu nunatsinni isikkamik arsarnermi pissartanngorniuttoqarsinnaaneranik isumaqarpoq.

AAMMA ATUARUK Narsaq: Covid-19-imik tunillatsissimasoq ataaseq paasineqartoq

Kisianni coronamik tunillatsissimasumik uppernarsaasoqarsimappat illoqarfimmi pineqartumi ulluni 30-ni unammisoqarsinnaassanngilaq. Malittarisassat taamaapput.

Taamaammat angalasut tamarmik immikkut mianersornissaat  Finn Meinelip kaammattuutigaa.

- Maannakkut unammisaqattaartoqartitsisinnaanerput nuannaarutigingaatsiarparput. Nunatsinni pissartanngorniuttoqarnissarpassui nunallu immikkoortuani unammisaqattaartoqarnissai pilersaarusiuleruttorpagut.

- Inuilli nunani allaneereerlutik angerlarunik tunillatsissimasutullu uppernarsarneqarnissaat soorunami ernumatigingaatsiarparput. Taamaattoqarpammi taakku illoqarfigisaat ulluni 30-ni unammisaqattaarfigineqarsinnaassanngilaq, arsartartut kattuffiani siulittaasoq oqarpoq.

Narsami piffissami aggersumi unammisoqarsinnaanngikkallarpoq

Angutit utoqqasaat 35-nit qummut ukiullit Narsami sapaatip-akunnera 14-imi nunatsinni pissartanngorniuttussaapput. Tassa qaammat ataaseq qaangiuppat, taamaammat pissartanngorniuttoqarsinnaassaaq. Kisianni tunillatsissimasumik illoqarfimmut unammiffiusussamut tikittoqarpat tamanna pilersaarusiornerpassuarnut ajutoortitsisinnaavoq.

- Narsami unammiuaartitsisinnaanngikkallarpugut, kisianni illoqarfinni amerlanerpaani unammisaqattaartitsisinnaanissarput neriuutigaarput. Illoqarfimmut ataatsimut qassiiusunulluunniit tunillatsissimasunik tikittoqassagaluarpat, illoqarfiillu taakku unammiffigisinnaanngikkutsigit tamanna aliasuutigingaatsiassavarput.

AAMMA ATUARUK Nakorsaaneq Narsami tunillatsissimasoqarnera pillugu: Peqqissartut Illuanneeruit eqqumaffiginninniarit

Finn Meinelip angalasut immikkut mianersornissaat taamaammat kaammattuutigaa.

- Nunami allamiinnermi tunillatsinnissaq immikkut mianersuunneqassaaq.

- Angerlamullu tikinnermi angerlarsimaannaqqusaanermut malittarisassat torersumik malinneqassallutik.

Nunatsinni pissartanngorniunnermik aaqqissuussinissamut illoqarfik aaqqissuussiffiusussaq tunillatsissimasumik sivikinnerpaamik qaammat ataaseq uppernarsaasoqarfiussanngilaq, tunillatsissimasumilli uppernarsaasoqassappat nunatsinni pissartanngorniunneq kinguartinneqanngikkuni illoqarfimmi allami ingerlanneqartussanngorsinnaasoq, siulittaasoq oqarpoq.

Nunatsinni pissartanngorniunnissarpassuit 

Nunatsinni unammisartut ukiui malillugit pissartanngorniunnerit illoqarfinni ukunani aaqqissuunneqassapput:

Maniitsoq: Sapaatip-akunnera 12-imi niviarsiaqqat U-15-it pissartanngorniutissapput. Arnat utoqqasaat Maniitsumi sapaatip-akunnera 16-imi pissartanngorniutissapput.

Aasiaat: Sapaatip-akunnera 12-imi nukappiaqqat U-15-it pissartanngorniutissapput.

Ilulissat: Sapaatip-akunnera 13-imi U-18-it pissartanngorniutissapput

Nuuk: Sapaatip-akunnera 14-imi arnat pissartanngorniutissapput. Sapaatip-akunnera 16-imi angutit utoqqasaat 45-nit qummut ukiullit pissartanngorniunnissamut anngunniutissapput. Sapaatip-akunnera 18-imi nukappiaqqat U-18-it pissartanngorniutissapput.

Angutit utoqqasaat 35-nit qummut ukiullit Narsami sapaatip-akunnera 14-imi pissartanngorniutissapput.

Pissartanngorniunnermik aaqqissuussinermut piumasaqaatit

Naalakkersuisut nunatsinnut angalanermut killilersuineq apriilip ulluisa 18-iannut sivitsorpaat. Tassa imaappoq, oqartussanit akuerineqarsimasut kisimik, tassa inuit corona pillugu allattoqarfimmit akuerineqarsimasut kisimik, nunatsinnut isersinnaapput.

Naalakkersuisummi coronavirusi ingammik coronavirusit ilaat Tuluit Nunaanneersoq Danmarkimilu tuniluutileruttortoq nunatsinni siaruatsaalerusullugu taamaaliorput. Coronavirusit ilaat Tuluit Nunaanneersoq coronavirusimit tuniluutileqqaartumit tuniluutianeruvoq.

Corona pillugu killilersuinernik qasukkaaneq killilimmik piffissaligaasoq, Naalakkersuisut oqarput.

Tassa imaappoq, Naalakkersuisut nunatsinnut angalaneq apriilip ulluisa 18-iata kingorna ammaqqikkunikku killilersueqqilissapput. Naalakkersuisulli qanoq sukannertigisumik killilersuinissartik apriilip ulluisa 18-iata qallinerani aatsaat aalajangerniarpaat.

Nunatsinni pissartanngorniutsitsinermut piumasaqaatit tallimaapput:

Illoqarfinni ukunaniinnaq aaqqissuussisoqarsinnaavoq: 

• Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq. 
• Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
• Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
• Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
• Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.