Danmarkimit Narsamut tikittoq covid-19-imik tunillatsissimasoq paasineqarpoq. Nakorsaanerup Henrik L. Hansenip pineqartoq qanoq innersoq oqaaseqarfigiumanngilaa. Toqqorsivimmit assi.Assi: KNR / Malik Brøns

Nakorsaaneq Narsami tunillatsissimasoqarnera pillugu: Peqqissartut Illuanneeruit eqqumaffiginninniarit

Kalaallit Peqqissartut Illuanni Københavnimiissimasoq tunillatsissimalluni Narsamut tikissimavoq. Nakorsaanerup Narsamiittut eqqisisimaqquai.

Kalaallit Peqqissartut Illuanni Københavnimi coronamik tunillatsinik sapaatini akunnerni kingullerni uppernarsaasoqaqqippoq.

Napparsimasut qanigisaasullu tallimat tunillatsissimasutut uppernarsarneqartut Peqqinnissamut aqutsisoqarfiup ataasinngormat nalunaarutigaa.

Napparsimasorli peqqissartut illuannit piffissami tassani nunatsinnukareersimavoq, nunattalu kujasissortaata ilaanut Narsamukarluni, tassanilu tunillatsissimasoq paasineqarpoq.

Peqqissartut Illuat pillugu naatsumik: 

 

* Inuit marluk peqqissartut illuanni najugaqanngitsut illumulli attuumassuteqartut januaarip qaammataani tunillatsissimasut aamma paasineqarpoq.


* Peqqissartut Illuanni najugaqartut peqqissartoq qanigisaasorlu tunillatsissimasut siorna poorskimi paasineqarpoq.

* Peqqissartut qanigisaasullu tallimat peqqissartut illuanniittut coronamik tunillatsissimasut ataasinngormat uppernarsarneqarpoq.

Paasissutissarsiffik: KNR

Tunillatsissimasoq nunatsinnut februaarip ulluisa 23-anni tikippoq, taannalu tikinnerminit ullut tallimassaani misissorteqqilluni. Taassuma misissortinnerata tunillatsissimasoq uppernarsarpaa, nakorsaaneq, Henrik L. Hansen oqarpoq.

AAMMA ATUARUK Narsaq: Covid-19-imik tunillatsissimasoq ataaseq paasineqartoq

- Kalaallit Peqqissartut Illuanni Københavnimi piffissami kingullermi tunillaassuuttoqarpoq, peqqissartullu qassiiusut tunillatsissimallutik.

- Taamaammat napparsimasut nunatsinnut utertussat ilaat tunillatsissimallutik tikissinnaanerat aarlerinartoqartoq ilisimalluarparput. Maannalu taama pisoqarpoq, nakorsaaneq oqarpoq.

Angalasut tamarmik eqqumaffiginninniarsarissasut

Taamaammat politiit nakorsaaneqarfiullu coronamik tunillatsissimasumut qanillisimasut attaveqarfigiortuleruttorpai. Inuillu attuumassuteqartut tamarmik maanna sianerfigineqareerput.

- Danmarkimit utertut tamarmik, ingammik peqqissartut illuanniissimasut tunillatsissimasinnaanermut eqqumaffiginninniarnissaannik piumaffigivagut.

- Piffissamimi aggersumi tunillatsissimasunik amerlanerusunik takusaqarnissatsinnut ilimanaateqarluarpoq. Peqqissartut Illuanniissimasut tunillatsissimasinnaanerat ingammik ilimanaateqarpoq, Henrik L. Hansen oqarpoq.

AAMMA ATUARUK Københavnimi peqqissartut illuanni napparsimasut qanigisaasullu tallimat coronamik tunillatsissimasut

Taamaammat Narsami innuttaasut eqqissisimanissaat ernumannginnissaallu kaammattuutigaa:

- Kikkut tamarmik eqqissisimasumik iliuuseqarnissaat innersuussutigaarput. Tunillatsissimasumut attuumassuteqartut attavigaagut, nakkutigineqarsinnaalluarporlu.

- Narsami tunillaassuuttoqalersinnaanissaanut ilimanartoqarneratut isiginngilarput, Henrik L. Hansen oqarpoq.

Tunillatsissimasoq qanoq innersoq KNR-imit apeqqutigaarput, nakorsaanerulli tamanna ”inunnut ataasiakkaanut” tunngassuteqarmat itinerusumik oqaaseqarfiginianngilaa.

Coronavirusimik tunillatsissimasutut nunatsinni uppernarsarneqarsimasut katillugit 31-upput. Taakkunannga 30-t peqqisseqqittutut nalunaarutigineqarnikuupput.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 21.610
  Tunillanneqarsimasut
31
  Peqqisseqqittutut nalunaarutigineqartut 31
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: Nunatsinni Nakorsaaneqarfik
  Nutarterneqarnera:
  apriilip 16-at 2021 nal. 12:45