Københavnimi peqqissartut illuanni napparsimasut qanigisaasullu tallimat coronamik tunillatsissimasut

Københavnimi Kalaallit Peqqissartut Iluanni coronamik tunillatsissimasoqaqqilerpoq.

Peqqissartut qanigisaasullu peqqissartut illuanniittut tallimat tunillatsissimapput, Peqqinnissaqarfiup qullersaqarfia KNR-imut paasissutissiivoq.

Peqqissartut Illuanni tunillatsissimasunik aatsaat siullermeertumik uppernarsaasoqanngilaq. Peqqissartut illuanni najugaqanngitsut tassungali atassuteqartut marluk januaarimi aamma tunillatsissimasut paasineqarpoq.

Peqqissartoq peqqissartut illuanniittoq qanigisanilu tunillatsissimasut siorna poorsimi aamma uppernarsarneqarput.

Pulaartoqaqqusaanngitsoq ineeqqamilu nerisarneq

Peqqissartut Illuanni oqaaseqartitsiniarneq iluatsinngilaq.

Peqqinnissaqarfiup qullersaqarfiali KNR-imut mailikkut allappoq:

Peqqissartut Illuannut pulaartoqarnissaa suli inerteqqutaavoq, init ataatsimoorfiusartut matoqqapput, peqqissartullu namminneq ineeqqaminni nerisarlutik.

Najugaqartut sulisullu tamarmik misissortissapput, taakkulu peqqissartut illuanni sumiiffinnut tamanut ingerlanerminni anersaartuutinut illersuuteqanngikkunik kiinnamut assiaquteqassallutik – taakkuli namminneq ineeqqaminniinnerminni atussanngilaat.

AAMMA ATUARUK Københavnimi peqqissartut illuannut attuumassuteqartut marluk coronamik tunillatsissimasut

Nunatsinniit nakorsiartunik pqqissartut illuannut sapaatip akunnerani matumani aallartoqassanngilaq.

Napparsimasut sapaatip akunnerata tullianut utaqqisinneqarsinnaanngitsutut nalilerneqartut akunnittarfimmut inissinneqassapput.

Peqqissartut Illuannit napparsimasup tunillatsissimannginnerata uppernarsarneqannginnerani nunatsinnut aamma angerlartitsisoqarnavianngilaq. 

Nunatsinni tunillatsissimasut tamarmik peqqisseqqissimasut

Nunatsinni coronamik tunillatsissimasunik piffissami matumani uppernarsaasoqanngilaq.

Katillugit inuit 30-t tunillatsissimasutut nalunaarsorneqarnikuupput, taakkulu tamarmik peqqisseqqillutik.

Danmarkimi tamanna allaanerungaatsiarpoq: Ullup ataatsip kingulliup ingerlanerani tunillatsissimasut 497-it uppernarsarneqarput.

Taakkunannga 243-t napparsimmavimmi uninngapput, taakkunanngalu 44-t peruluttut uninngavianniillutik.

Tunillatsissimasunit sisamat ullup ataatsip kingulliup ingerlanerani toqupput.

Kalaallit Peqqissartut Københavnimi Illuat Nuummi Dronning Ingrip Napparsimmaviata ataani inissisimavoq, Danmarkimili inissisimammat danskit peqqissutsimut oqartussaasuisa maleruagassiaannik malinnittussaavoq.

Kalaallit nappaamminnik Danmarkimi illoqarfiit pingaarnersaanni katsorsartittut peqqissartut illuanni najugaqarput.

Taakkunannga amerlasuut piffissami sivisuumi katsorsartittussaapput. Taakkuli tapersersorneqarnissartik, isumagineqarnissartik ineqarnissartillu pisariaqartippaat – taakkulu peqqissartut illuanni pissarsiarisinnaallugit.