Københavnimi peqqissartut illuannut attuumassuteqartut marluk coronamik tunillatsissimasut
Napparsimasut marluk Københavnimi Kalaallit Peqqissartut Illuannut attuumassuteqartut coronamik tunillatsissimapput.
Tamanna nakorsaanerup, Henrik L. Hansenip KNR-imut uppernarsarpaa.
- Marlunnik tunillatsissimasunik uppernarsaasoqarnera ilumoorpoq, nakorsaaneq oqarpoq.
Peqqissartut illuanni 63-it maanna najugaqarput.
Napparsimasut nunatsinneersut maanna Danmarkimiittut 90-it missaanniipput.
Taamaammat peqqissartut illuanni najugaqartut coronamut misissorneqarnissaat maanna ulapputigineqarpoq, immikkoortortaqarfimmi aqutsisoq, Birtha Bianco oqarpoq.
- Pisut takulluarsinnaaleriartorpagut. Napparsimasut tamarmik misissorneqaleruttorput, sulisut misissorneqarnissamik aamma neqeroorfigineqarput. Napparsimasut ineeqqaminniipput, taxallu maanna misissortittarfimmullu uteqattaarput, Birtha Bianco oqarpoq.
Nakorsiartut PCR-mik misissorneqarput, misissuineq taanna toqqusaakkut tigusiffigitinnermik ilaqarpoq.
Siullerpaajunngitsoq
Peqqissartut illuanni napparsimasunilluunniit najugaqarfimmut atassuteqartunik coronamik aatsaat tunillatsittoqanngilaq.
Peqqissartut illuanniittoq napparsimasoq qanigisanilu poorskikkunni aamma tunillatsinnikuuvoq.
Tunillatsissimasutut nunatsinni uppernarsarneqarsimasoq maanna ataasiinnaavoq. Danmarkimili pissutsit allarluinnaarpput:
Danmarkimi tunillatsissimasut amerlassusaat decembarimi qaffapput, maannali ikinnerullutik: Danmarkimi tunillatsissimasutut uppernarsarneqartut akunnerit 24-t kingulliit 886-iupput.
132-it peruluttut uninngavianniipput, 35-llu ippassat toqullutik.
Danmarkimi coronamik tunillatsissimasutut nalunaarsorneqarsimasut katillugit 191.000-iupput.
Nunatsinni nalunaarsorneqarsimasut 30-upput.
Napparsimasut sivisuumik katsorsarneqartuusut
Københavnimi Kalaallit Peqqissartut Illuat Nuummi Dronning Ingriup Napparsimmavissuata ataaniippoq, Danmarkimiimmalli danskit peqqinnissamut oqartussaasuisa malittarisassaannik tunngaveqarpoq.
Kalaallit nappaamminnik Danmarkimi illoqarfiit pingaarnersaanni katsorsarneqartut Peqqissartut illuanni najugaqarput
Taakkunannga amerlasuut sivisuumik katsorsarneqartuupput, piffissarlu tamakkiisoq napparsimmavimmi uninngasarnatik. Taakkuli tapersersorneqarnissartik, paaqqutarineqarnissartik ineqarnissartillu pisariaqartippaat – tamanna peqqissartut illuanni pissarsiarisarpaat.
