Nakorsaanerup akiuussutissat ikinnerusut naatsorsuutigigai: Kapuutit imai Danmarkimut tunniunneqartussat 100.000-inik ikinnerusut
Danmarkip akiuussutissat Pfizer/BioNTechimit ukiup sisamararterutaani siullermi pissarsiassatut naatsorsuutigisaatut amerlassuseqarsinnaanngillat.
Kapuutit imai pissarsiarineqartussat 85.000-init 100.000-inut ikilipput. Statens Serum Institut (SSI) nittartakkamini taama paasissutissiivoq.
Akiuussutissap imai aallaaqqaammut naatsorsuutigineqartunit 10 procentip missaanik ikinnerusut pissarsiarineqassapput.
Ikilinerat pissutigalugu pilersaarutigineqartumit inuit 42.000-init 50.000-inut ikinnerusut ukiup sisamararterutaani siullermi kapitissapput, inuimmi tamarmik marloriarlutik kapitittussaapput.
AAMMA ATUARUK Peqqinnissaqarfik: Coronamut akiuussutissaq siarngutigiunnaarniarsiuk
Tamannalu nunatsinni akiuussutissamik kapuinermut aamma sunniuteqarnissaa qularnanngitsoq, nakorsaaneq, Henrik L. Hansen KNR-imut oqarpoq:
- Akiuussutissat assinganik ikinnerusunissaat naatsorsuutigissavarput, nakorsaaneq oqarpoq.
Nassiussinermi siullermi kapuutip imassai 1305-iupput.
Akiuussutissat 402-t Ilulissanut nassiunneqarput, 903-llu Nuummi atorneqarlutik.
396-it peqqinnissaqarfimmi kiffartuussisunut, 133-t paaqqutarinnittarfinni kiffartuussisunut 776-illu utoqqarnut, paaqqutarinniffinni najugalinnut inunnullu immikkut ittumik nappaatilinnut atorput.
- Danskilli nassiussuinissamut pilersaarutaat suli pissarsiarinngilarput, taamaammat nunatsinnut qanorpiaq sunniuteqassanersoq aamma oqaatigisinnaanngilara.
Nunatta Pfizer/BioNTechimit akiuussutissat nassiunneqartut siulliit sapaatip-akunnerani siullermi pissarsiarai.
Kapuutit imarisai 1.305-it pingaartumik Nuummi Ilulissanilu inunnut tunniunneqarput.
Nassiussat tullii sapaatip-akunnerata siuliani tikipput, taakku Qaqortumi, Aasianni Sisimiunilu innuttaasunut peqqinnissaqarfimmilu sulisunut kiffartuussisunut tunniunneqarput.
Qaqugu pingajussaanik nassiussisoqassanersoq nakorsaanerup suli ilisimanngilaa. Akiuussutissallu qanoq annertutigissanersut aamma ilisimanngilaa.
Kapuutit imai pissarsiassat affaannaasut
Pfizer/BioNTechip Belgiami suliffissuani allanngortiterineq pissutigalugu Danmarkimut akiuussutissat ikinnerusut nassiunneqassasut sapaatip-akunnerani matumani nalunaarutigaa.
Tamanna pissutigalugu kapuutit imassai 30.000-init 35.000-inut amerlassuseqartut sapaatip-akunnerani matumani tikiunneqarput, taakkulu naatsorsuutigisamit affaata missaanik ikinnerullutik.
AAMMA ATUARUK Nakorsaanerup Facebookikkut apeqqutit akissuteqarfigai: Akiuussutissaq annikitsumik napparsimatitsisarpoq
Pfizerip neriorsuutigisaatut tunniussisoqarnissaa pillugu danskit peqqinnissamut oqartussaasuisa EU-miillu sulissutigineqartoq, Ole Jensenip oqaatigaa.
- Sapinngisarput tamaat iliuuseqarrpugut. Akiuussutissat naatsorsuutigisatta pissarsiarinissaat pissutigalugu Pfizer qanimut attaveqarfigaarput, Ole Jensen oqarpoq.
Allaanerusumik pingaarnersiuineq
Pfizerip neriorsuutaasumik ikinnerusunik tunniussinissaa Statens Serum Institutip pisortaata tulliata, Ole Jensenip akunnakusoornartoqarnerarpaa.
- Ajoraluaqaaq, pissutigalugu nappaalasoqarnerani akiuussutissanik kapisinerit aallartinnissaanut pingaartumi inissisimavugut, taamaammat ukiup sisamararterutaani siullermi naatsorsuutigisamit 50.000-inik ikinnerusut naammassisinnaavagut, Statens Serum Institutimi pisortap tullia, Ole Jensen oqarpoq.
Akiuussutissat pissarsiarineqartut ikinnerunerat pissutigalugu allaanerusumik pingaarnersiuisoqassasoq, Peqqinnissamut aqutsisoqarfiup marlunngormat paasissutissiissutigaa.
Tamanna pissutigalugu utoqqaat angerlarsimaffiini najugaqartut innuttaasullu utoqqaat siullermeertumik sapaatip-akunnerani matumani kapitinnissamut inniminninnerneqareersimasut akiuussutissamik aappassaanik kapineqarnissaat sapaatip-akunnerani matumani salliutinneqarniarput.
