Peqqinnissaqarfik: Coronamut akiuussutissaq siarngutigiunnaarniarsiuk

Kikkut qaqugu akiuussusernissaannut pilersaarut malipparput, peqqinnisaqarfiup pisortaa oqarpoq.
Allattoq Christine Hyldal
januaarip 18-at 2021 15:00
Nutserisoq Hanne Petersen

Attavigiumaarpatsigit – taamaammat sianerfigisariaqanngilatsigut.

Peqqinnissaqarfik, inunnit coronamut akiuussuserneqarnissaq pillugu piffisami kingullermi sianerfigineqaqisoq, taama nalunaarpoq. 

Inuilli siarngukkaangamik oqarasuaatikkut attaveqarniarneq kipiluttunareersoq kipiluttunarneruliinnartarpoq, aamma kikkut qaqugu akiuussusernissaannut pilersaaruteqareerpugut, peqqinnissaqarfiup pisortaa Joanis Erik Køtlum tusagassiuutinut nalunaarpoq.

- Taakkua qaqugorpiaq akiuussuserneqassanersut ajoraluartumik massakkorpiaq oqaatigisinnaanngilaq, qanittukkulli tassa sapaatit akunnerini tulliuttuni pinissaa naatsorsuutigaarput. Ulluliisoqareerpat innuttaasut tamanna pillugu tusagassiuutitigut paasisutissinneqarnissaq naatsorsuutigisinnaavaat, Joanis Erik Køtlum oqarpoq.

AAMMA ATUARUK Coronamut akiuussusiisoqaleruttorpoq: Nuummi kapitittoq siulleq

Akiuussutissat tikittut ingammik Nuummi Ilulissanilu inunnut 1.305-inut atorput.

Akiuussutissat nunatsinnut tikittut siulliit 1305-iupput. 

Taakkunannga 402-t Ilulissanut nassiupput, 903-llu Nuummi atorneqarlutik.

396-it peqqinnissaqarfimmi sulisuni pisariaqartitsinerpaanut, 133-t paaqqutarinnittarfinni sulisuni pisariaqartitsinerpaanut 776-illu utoqqarnut, paaqqutarinniffinni najugalinnut inunnullu immikkut ittumik nappaatilinnut atorput.

Akiuuusutissat Peqqinnissaqarfimmut ukiortaareersoq tikittut siulliit ukiortaami sapaatit akunneranni siullermi nungupput. 

Utoqqaat illui, utoqqaat taavalu utoqqaat illuini peqqinnissaqarfimmilu sulisut pisariaqartitsinerpaat

Akiuussutissat nunatsinnut nassiussat tullii sapaatit akunnerata siuliani tikipput, taakkualu Qaqortumi, Aasianni Sisimiunilu innuttaasunut taavalu utoqqaat illuini peqqinnissaqarfimmilu sulisuni pisariaqartitsinerpaanut ut atorput.

Assi © : KNR / Malik Brøns

- Akiuussutissat amerlassusaat killeqarmata kikkut siulliullutik akiuussutissinneqarnissaannut tulleriiaarisoqarpoq. Paaqqutariffinni najugallit, utoqqaat, paaqqutarinniffinni peqqinnissaqarfimmilu sulisut pisariaqartitsinerpaat innuttaasullu immikkut ittumik nappaatillit salliunneqassapput,” Joanis Erik Køtlum oqarpoq.

AAMMA ATUARUK Nakorsaanerup Facebookikkut apeqqutit akissuteqarfigai: Akiuussutissaq annikitsumik napparsimatitsisarpoq

- Peqqinnissaqarfimmut piffissami kingullermi siarnguttut ilarpassui tassaapput akiuussutissinneqarnissamik kissaateqartut qujaannariarlutillu isummaminnik allannguisimasut. Tamanna nuannaarutigisorujussuuarput.

Ulluliinerit tusagassiuutinut nalunaarutigineqassasut

Tikittunit siullernit ingammik Nuummi qulaani taaneqareersunut akiuussutissiineq suli naammassineqanngilaq. 

Pfizerip BioNTechillu akiuussutissaliaat nunatsinni atugaavoq. 

AAMMA ATUARUK Modernap akiuussutissaliaa Danmarkimi atulertoq

Akiuussutissaq taanna 70-it 80-illu akornanni nillertigisumi qerititsivimmiituutigineqartussaammat passukkuminaanneruvoq. 

Akiuussutissaq alla, tassa Amerikami nakorsaasiorfissuup Modernap akiuussutissaliaa, aamma akuerineqareerpoq, taannalu taama nillertigisumi qerititsivimmiittuutigisariaqanngimmat passukkuminarneruvoq.