Coronamut akiuussusiisoqaleruttorpoq: Nuummi kapitittoq siulleq
Covid-19-imut nunatsinni siullerpaamik akiuussusiisoqaqqammerpoq. Tamanna Nuummi sammisassaqartitsiviutigaluni paaqqutarinnittarfimmi Ippiarsummi najugalik, Sofie Hegelund 79-inik ukiulik, ullaaq nalunaaqutaq 9.20 kapineqarmat pivoq.
Utoqqaat Ippiarsummi najugallit tassanilu sulisut covid-19-imut nunatsinni akiuussuserneqaqqaartuussat marloriarlutik kapitissapput.
Nakorsaasiorfissuit Pfizerip Biontechillu akiuussutissaliaat Danmarkimit nunatsinnut sapaatit akunnerata siuliani tikittut siulliit 1.000-t missaanniittut Nuummukartuullutillu Ilulissanukartuupput.
Akiuussusiinissamut periusissiaq
Pisariaqartitsinerpaat, tassa utoqqaat illuanni najugallit sulisullu, innuttaasut 75-ileereersut taakkununngalu sullissisut, peqqissutsimut oqartussat periusissiaat malillugu akiuussuserneqaqqaassapput.
Taakkua akiuussuserneqareerpata soorlu pualluttut, uummalluttut sukkortulluunniit akiuussuserneqaqqaartussani tulliussapput.
AAMMA ATUARUK Covid-19-imut akiuussutissamik ataasinngorpat kapiteqqaartoqassaaq
Ilulissanilu marlunngorpat siullerpaamik akiuussusiisoqassaaq, illoqarfimmilu tassani utoqqaat illuanni nagujallit aamma salliunneqassallutik.