Covid-19-imut akiuussutissamik ataasinngorpat kapiteqqaartoqassaaq

- Taakku siulliunneqarnissaat pingaartinnerpaatittuarsimavagut, nunatsinni sapaatit akunnerata tulliani akiuussutissamik kapiteqqaartussat pillugit, nakorsaaneq taama oqarpoq. Tassalu Nuummi Ilulissani akiuussutissiinissaq.
Nuummi Ilulissanilu covid-19-imut akiuussutissalersuineq sapaatit akunnerata tulliani aallartissaaq. Assi toqqorsivimmit. Assi © : Claus Bech/Ritzau Scanpix
januaarip 03-at 2021 12:27

Karsi immikkuullarissoq sapaatit akunnerata siuliani nunatsinnut tikiunneqarpoq. Taanna covid-19-imut akiuussutissanik 975-inik imaqarpoq, taakkulu sapaatit akunnerata tulliani agguaanneqassapput.

Nunatsinni kapiteqqaartussaq siulleq Nuummi utoqqaat illuanni Ippiarsummi kapitissaaq.

Peqqinnissaqarfimmiut kapooralutik sapaatit akunnerata tullianiit ulapputissaapput, Henrik L. Hansen oqarpoq.

- Akiuussutissat 1000-it pigaagut, taakkulu tamarmik atussavagut. Sapaatillu akunneri pingasut qaangiuppata aappassaaneerlutik akiuussutissat  takkuteqqinnissaat naatsorsuutigaagut.

Akiuussutissaq iluaqutaassappat marloriarluni kapitittoqartariaqarpoq.

AAMMA ATUARUK Coronavacciner klar til alderdomshjem: Beboere glæder sig

Siullermik utoqqaat illuanni Ippiarsummi najugallit, sulisullu kapineqaqqaassapput. Taassumalu kingorna Sanami sulisut akiuussuserneqassapput. Ilulissani siullermeerluni marlunngorpat akiuussutissiisoqassaaq, tassani aamma utoqqaat illuanniittut siulliunneqassallutik.

- Taakku siulliunneqarnissaat pingaartitarilluinnarparput, nakorsaaneq oqarpoq.

Innuttaasut attaveqarfigineqassapput

Kikkut akiuussutissamik pisariaqartitsinerunersut peqqinnissaqarfimmi oqartussanit pilersaarusiorneqarput. Tassalu utoqqaat illuani najugallit, sulisut innuttaasullu 75-it sinnerlugit ukiullit, siulliunneqassapput.

Taakku kapitereersimaleriarpata innuttaasut coronamik ulorianartorsiorsinnaasut, soorlu, pualuttut, uummalluttut sukkortulluunniit kapitissapput.

- Taakku corona napparsimassutigerujussuarsinnaagamikkit siulliunneqassapput. Nunatsinni napparsimmavinni uninngasinnaasut amerlassusaat, nakorsat peqqissaasullu amerlassusaat eqqarsaatigalugit, artukkerniarnagillu pingaarnersiuisariaqarsimavugut, nakorsaaneq itisiliivoq.

AAMMA ATUARUK Ilimanassuseqanngitsumit matusinermut: Nunarsuaq tamakkerlerlugu tunillaassuunneq annguteqqajaasoq

Taakku akornanniikkaluaraanniluunniit, namminneerluni peqqinnissaqarfimmut saaffiginnittoqassanngilaq. Oqartussat namminneerlutik attaveqassapput, attaveqarfigineqartorlu aperineqassaaq kapitikkusunnersoq. Tassami inuup nammineq toqqassavaa kapitissanerluni kapitissannginnerluniluunniit. Nakorsalluunniit innersuussutigigaluarpagu, piumanngippat ataqqineqassaaq.

Akiuussutissaq illoqarfinnut nunaqarfinnullu mikinerusunut sinerissamut nassiussuunneqalerpat, utoqqaat immikkut siulliunneqarnissaat ilimananngilaq. Tassami illoqarfiit minnerusuni, nunaqarfinnilu najugallit tamarmik ataatsikkut akiuussusersorneqarumaarput.

Akiuussutissaq alla akuerineqarnissaa neriuutigineqarpoq

Nakorsaataarniarfinniit Pfizerimit Biontechimiillu akiuussutissat Danmarkimut tikiuttut aamma nunatsinnut ingerlateqqinneqarput. Taakkulu pisariusorujussuupput.

Taanna 80 minus gradernik nillertsigisumi uninngatinneqartussaavoq, atunnginneranilu kimikillisarlugu akuneqaqqaassaaq, taamaammat akiuussutissaq pisariunnginnerusoq Modernamersoq sapaatit akunnerata tulliani akuersissutigineqarnissaa nakorsaanerup neriuutigaa.