Kalaallit niviarsiaqqat arnallu nunatsinni najugaqarsimanngitsut akuersissuteqaratik naartunaveersaaserneqarsimagunik aamma taarsiiffigineqarsinnaatinniarneqarput.

Tamanna inatsisissatut siunnersuummut, arnanut eqqugaasimasunut taarsiissuteqarnissamut tunngasumut allannguutissanut siunnersuummi allassimavoq. Inatsisissatut siunnersuut Folketingimi marlunngornermi aappassaaneerneqarpoq.

Inatsisissatut siunnersuummi arnat akuersissuteqaratik spiralilerneqarsimasut imaluunnit Depo-Proveramik naartunaveersaaserneqarsimasut taarsiissuteqarfigineqarsinnaassagunik 1992 tikillugu najugaqarsimassasut allassimaqqaaraluarpoq.

- Inatsisip suliarineqarnerani malittarisassat siunnersuutigineqartut arnat nammineq paasinninnerat naapertorlugu kalaaliunertik pissutigalugu Danmarkimi naartunaveersaaserneqarsimasut inuunertik tamaat Danmarkimi najugaqarsimasut taarsiiffigineqarsinnaatissanngikkaat paasinarsivoq, danskit peqqinnissamut ministerianit, Ida Aukenimit allannguutissatut siunnersuummi allassimavoq.

Folketingimut ilaasortat marluk tassa Naaja H. Nathanielsenip (IA) aamma Qarsoq Høegh-Damip (N) oqarnerat naapertorlugu taarsiiffigineqarnissamut Kalaallit Nunaanni najugaqarsimanissamik piumasaqaatip politikerit inatsimmik sisamanngornermi taasinnginneranni allanngortinnissaa pingaaruteqarluinnarsimavoq.

- Naggueqatigiit inuit kinguaavi naak nunatsinni najugaqarsimanngikkaluarlutik eqqugaasimasut ilisimavarput. Taakku aamma ilaatinneqarnissaat uagutsinnut pingaaruteqarpoq, Naaja H. Nathanielsen oqarpoq.

Nunat inoqqaavi illersorneqassasut

Qarsoq Høegh-Damip oqarnera naapertorlugu inatsisissatut siunnersuummi aaqqissuussineq kalaallinut niviarsiaqqanut arnanullu nunat inoqqaavineersunut kisimi tunngasuunerata erseqqissumik allassimanissaa pingaaruteqarpoq.

- Kalaallit niviarsiaqqat arnallu aaqqissuussaanikkut assigiinngisitsiffigineqarput. Ministeriunerup tamanna ersarissumik oqaatigaa. Taarsiissuteqarnissamut tamanna isumaqatigiissutaavoq, taanna ministeriunerup arnanut eqqugaasimasunut septembarimi utoqqatserneratigut innersuussilluni oqarpoq.

- Nunat inoqqaavisut illersugaavugut. Taamaammat arnaq kalaaleq najugaqarsimanermik uppernarsaammik takutitsisinnaanngitsoq akuersissuteqaranili naartunaveersaaserneqarsimasoq danskit inatsisaat pissutigalugu pisinnaatitaajunnaarsinneqassanngilaq, taanna oqarpoq.

Folketingimut ilaasortat marluk inatsisissatut siunnersuummut arlalinnik apeqquteqaateqarput.

Naaja H. Nathanielsenip (saamerleq) aamma Qarsoq Høegh-Damip (talerperleq) inatsisissatut siunnersuummut allannguuteqartoqalernera nuannaarutigaat. Assi © : Ida Marie Odgaard/Ritzau Scanpix/Mads Claus Rasmussen/Ritzau Scanpix

Suliniaqatigiiffiit soorlu Inuit Pisinnaatitaaffii pillugit Siunnersuisoqatigiit (IPPS) aamma inatsisitigut siunnersuisarfiup Stenbroens Juristerip inatsisissatut siunnersuummi arlallit siusinnerusukkut isornartorsiorpaat.

Inatsisissatulli siunnersuut sisamanngornermi pingajussaaneerneqarlunilu naggataarneqarpat Naaja H. Nathanielsenip aamma Qarsoq Høegh-Damillu tapersissavaat.

- Inatsisissatut siunnersuummi immikkoortut ilaat nunat inoqqaavisa pisinnaatitaaffiisa killinganiittut unioqqutitsisulluunniit isumaqarpunga. IA-llu inatsisissatut siunnersuut pisinnaatitaaffinnik taakkuninnga unioqqutitsisoq akuersissutigisinnaanngikkaa ersarippoq, taamaammat immikkoortut taakku allanngortinneqarnissaat uannut pingaaruteqarpoq, Naaja H. Nathanielsen oqarpoq.

Nalunaarusiat marluk aqaguani saqqummiunneqassasut

Nalunaarusiat spiralilersuinermut tunngasut marluk nutaat naalakkersuisunit suliakkiissutigineqarsimasut danskit politikeriisa inatsisissatut siunnersuummik taasinerisa aqaguani saqqummersinneqassapput.

Nalunaarusiani Danmarkip kalaallinik niviarsiaqqanik arnanillu tusindilikkaanik spiralilersuinera inuiannik nungusaanerunersoq aamma inuit pisinnaatitaaffii suut unioqqutinneqarsimanersut ilaatigut qulaajarneqarput.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisup, Mariane Paviasen Jensenip (IA) nalunaarusiat Nuummi tusagassiortunik tallimanngornermi katersortitsinermi saqqummiutissavai.

Nalunaarusianik ataasiinnaanngitsumik marlunnik tunniussisoqarnera immikkut ilisimasallit akornanni isumaqatigiinngissuteqartoqarneranik taamaammallu eqimattanut marlunnut avinneqarnerannik pissuteqarpoq.

Nalunaarusiami ataatsimi allaatiginnittut ilaata, eqqartuussissuserisup Jonas Christoffersenip inatsisip Folketingimi suliarineqarnerata nalunaarusiat saqqummersinneqarnissaata tungaanut kinguartinneqarnissaa Berlingskekkut kaammattuutigaa.

Naaja H. Nathanielsenip Qarsoq Høegh-Damillu tamanna itigartitsissutigaat.

Inatsit ministeriunerup Mette Frederiksenip arnanut eqqugaasimasunut utoqqatsissuteqarnerata kingunerigaa eqqaamassallugu pingaaruteqartoq taakku isumaqarput.

- Naapertuilluanngitsuliorneruvoq, maannalu utoqqatsissuteqarnikkut taarsiissuteqarnikkullu aaqqiissuteqarfigineqarniarpoq. Tamanna nalunaarusianit arlaannit allanngortinneqarsinnaanngissoraara, Naaja H. Nathanielsen oqarpoq.

Qarsoq Høegh-Damip nalunaarusiat nutaat saqqummersinneqarnerata kingorna malitseqartitsisoqarsinnaanissaa inatsisip mattutinngikkaa oqaatigaa.

Nalunaarusiat uku saqqummiunneqarnerata kingorna taarsiissuteqartoqarnissaanik allanik piumasaqaateqartoqarsinnaanera takorloorsinnaaviuk?

- Soorunami, taanna oqarpoq.