Kalaallit Airports nutaamik pisortaanertaassasoq

Peter Wistoft Kalaallit Airports Holding A/S-imi pisortaanertut atuuffimminit soraarniuteqarpoq.

Ingerlatseqatigiiffik tusagassiuutinut nalunaarummi taama allappoq.

Pisortaaneq Danmarkimi nutaanik unammillinnartussarsiorniarluni siorna marsip qaammataanili atorfigisaminit soraarniarpoq.

Aammattaaq ingerlatseqatigiiffinni immikkoortortaasuni, Kalaallit Airports International A/S-imi aamma Kalaallit Airports Domestic A/S-imi atorfimminit soraarniuteqarpoq.

Siulersuisut siulittaasuata, Johannus Egholm Hansenip Peter Wistoft suliniuteqarsimaneranut qujassuteqarfigaa:

- Annertuumik piginnaasaqartumik aallaqqaataaniilli mittarfiliassanut suliassani peqataasimasumik, aammalu suliassat siumut ingerlatinnissaannut annertoorujussuarmik suliniuteqarsimasumik annaasaqarnissaq siulersuisut ajuusaarutigaat, kisianni Peter Wistoft-ip aalajangiinera tusaatissatut tigullugu, tusagassiuutinut nalunaarummi oqarpoq.

AAMMA ATUARUK Kalaallit Airports Nuummi mittarfissami siullermeertumik qaartitsilerpoq

Soraarniuteqarnera 2020-mi septembarip ulluisa 30-annit atuutilissaaq. Taamaammat ingerlatseqatigiiffiup siulersuisui Nuummi, Ilulissani Qaqortumilu mittarfissat sanaartorneqarnerannut ingerlatsinerullu piareersarneqarneranut ingerlatsisinnaasumik nutaamik pisortassarsiuleruttorput.

Aviaaja Karlshøj Knudsen ulluinnarni aqutsinermut akisussaasuusoq pisortaaninngortussap sulilernissaata tungaanut ingerlatsigallassaaq.

Ingerlatseqatigiiffiup qullersaani nikittoqarnera suliarinnittussarsiuussinerit qassiiusut piareersarneqaleruttornerani pivoq.

Mittarfiit pingasut nutaat illutassaannut suliarinnittussarsiuussinerit, mittarfimmi teknikkikkut atortunik neqeroortitsineq annaassiniarnermullu atortunik neqeroortitsineq ilaapput.