NemKonto: Kalaallit 8.000 pisortaqarfinnit aningaasarsinngitsoorsinnaasut

Innuttaasut 8.000 missaat 12. aggusti pisortaqarfinnit aningaasarsinngitsoorsinnaasut ulloq taanna sioqqullugu NemKonto-mik pilersitsisimanngikkunik.

Allattoq Nicole Sander Bertelsen

aggustip 08-at 2023 16:00

Nutserisoq Per Rosing

Innuttaasut 8.261-t suli NemKonto-taarsimanngitsut ilagippatsit pisortanit aningaasarsiassatit tullianik ikisisoqalerpat pissaraluatit pinngitsoorsinnaavatit. Marlunngornermi ualikkut Namminersorlutik Oqartussat tusagassiuutinut nalunaarummi allapput.

NemKonto-qanngikkuit aggusti naalerpat akissarsiat, soraarnermusiat, ilinniarnermusiat, Isumaginninnermit ikiorsiissutit allat aamma Akileraartarnermut Aqutsisoqarfimmit utertoorutissat tigusinnaanngilatit.

- Pingaaruteqaqaaq tamarmik NemKonto-taarnissaat, taamaanngippat innuttaasut ilaat isertitaqanngitsoorsinnaapput taamaalillutillu ineqarnermut il.il. akiliutissaqanngitsoorsinnaallutik, Digitalinngortitsinermut Aqutsisoqarfimmi pisortaaneq Katrine H. Nathanielsen, tusagassiuutinut nalunaarummi oqarpoq.

NEMKONTO SUNAANA?

Kalaallit Nunaanni innuttaasut tamarmik NemKonto-qassapput.

NemKonto-taarsinnaavutit assigiinngitsut marluk aqqutigalugit:

Aningaaseriviit aqqutigalugu
NemKonto-mi imminut sullinneq
NemKonto.dk aqqutigalugu allakkatigut atuutsilersitsissutikkut.

NemKonto tassaavoq aningaaserivimmi konto nalinginnaalluinnartoq, pisortaqarfiit tamarmik aningaasanik tunniussinermi atortagaat.

Nammineq aalajangissavat aningaaserivimmi kontot sorleq NemKontotut atussanerlugu. Amerlasuut akissarsianut kontortik NemKontotut atorpaat.

NemKonto tassaavoq pisortaqarfinnit aningaasanik tunniussinermut systemi (ataqatigiissumik aaqqissorlugu) pisortaqarfiit tamarmik atortagaat. Siunissami pisortaqarfinnit aningaasarsiassat tamarmik illit NemKontonnut ikineqartalissapput, assersuutigalugu:

Akileraartarnermut Aqutsisoqarfimmit utertoorutissat
Pisortaqarfiit suliffiutaanni sulisunut akissarsiat soraarnerussutisiallu
Isumaginninnermit ikiorsiissutit
Ineqarnermut tapiissutit
Ilinniarnermusiat

Tigusiffik: Sullissivik

Allisiguk

Allanngortitsinissaq piffissaq sivitsortoq nalunaarutigineqartarsimavoq

Ukioq manna maajimi Digitalinngortitsinermut Aqutsisoqarfik siullermeerluni NemKontomik atuilernissaq nalunaarutigaa.

- Piffissaq sivitsortoq nalunaaruteqartarsimavugut 81 procentillu missaat massakkut NemKontoqartut tusarsimavaat. Uanili pingaaruteqarpoq innuttaasut 19 %-ii kingulliit aggustip 12-iat tikitsinnagu aamma pisaarnissaat taamaalilluta kikkut tamaasa qulakkeerniassagatsigit, Katrine H. Nathanielsen oqarpoq.

Aamma atuarukNemKonto aasap kingorna atuutilissaaq: Inuit ilai aningaasarsinngitsuussapput

Suli NemKontotaarsimanngikkuit netbankit aqqutigalugu, bankit saaffigalugu imaluunniit nemkonto.dk aqqutigalugu NemID-t atorlugu ikiorneqarsinnaavutit.

Nemkonto.dk aqqutigigukku malugissavat utaqqisinnaagavit atuutilersitsisunik allakkerivikkoortunik allagarsissagavit, taannalu pissarsiarereerukku aatsaat NemKonto atuutsilersinnaallugu, Namminersorlutik Oqartussat nalunaarput.

Nutaarsiassami kukkunermik nassaarsimaguit uunga allaffigineqarsinnaavugut.