NemKonto aasap kingorna atuutilissaaq: Inuit ilai aningaasarsinngitsuussapput

NemKontotaareersimanissamut Digitalimik Sullissinermut Aqutsisoqarfiup ulloq killigititaa nallerpagu inuit ilaat kontoeruttariaqassapput.

Digitalimik Sullissinermut Aqutsisoqarfiup pisortaa Katrine Hjelholt Nathanielsen oqarpoq.

Taassuma naatsorsuutigaa, ulloq nallertinnagu amerlanerpaat bankimut NemKontotaarniarsimariissasut.

Digitalimik Sullissinermut Aqutsisoqarfik naapertorlugu kisitsisit kingulliit malillugit innuttaasut 20.500-t suli NemKontomut nalunaarsorneqarsimanngillat.

Suli ulluliisoqanngilaq, aasalli kingorna pissaaq

Maani nunami NemKontoqaqqusineq sivitsortumik ingerlagaluartoq piffissamik killigititaasussamik suli ulluliisoqanngilaq.

Maajip 16-iani Kommuneqarfik Sermersooq tusagassiutinut nalunaarummik allappoq erseqqissaatigalugu pisortanit aningaasarsisitsinerit NemKonto atorlugu pissasut tamannalu piffissami qaninnerpaami pissasoq.

Katrine Hjelholt Nathanielsenilli oqaatigisinnaanngilaa qaqugu killissarititaasoq nalliutissanersoq:

- Suli ullormik killissarititaasumik ulluliinngilagut, naatsorsuutigaarpulli aasap kingorna tamanna piumaartoq, taanna oqarpoq.

Taanna erseqqissaavoq ulloq killissarititaasoq pillugu sapaatip akunnerata tulliani erseqqissumik nalunaaruteqassallutik.

- Taava aningaasanik pisinnaanavianngillat. Taamaammanuna inuit nemkontotaarnissamut nalunaarsupallannissaat pillugu siammasissumik nalunaarutiginiarsarigipput, tassami nalunaarsunngikkunik aningaasanik tigusisinnaanavianngimmata, Katrine Hjelholt Nathanielsen oqarpoq.

Taanna naapertorlugu kingusinaarluni NemKontotaarsimagaanni aningaasarsiat annaaneqarsinnaanngillat, aningaasammi NemKontotaareernermi aatsaat tiguneqarsinnaassapput.

Katrine Hjelholt Nathanielsenip naatsorsuutigisaatut piffissap killiliussap qaangernerani inuit ilaat aningaasarsinngitsoorsinnaagaluartut, tamanna killeqassanerarpaa:

- Neriuppunga inuit NemKontotaarnissamut kajumissuseqarluassasut, tassami taannaqanngippat aningaasarsisinnaanavianngillat, taamaammat naatsorsuutigaara aaqqiipallassasut, oqarpoq.

Utoqqaammi?

Katrine Hjelholt Nathanielsen naapertorlugu Digitalimik Sullissinermut Aqutsisoqarfik ukiup aappaa qeqqa qaangerlugu Sullissivik.gl aqqutigalugu NemKonto pillugu paasissutissiisimallutik.

Sukumiinerusumilli suli paasissutissiisimanngillat, tamannarpiaavorli ilaatigut utoqqaanerusunut kingunerluutaasoq.

NemKontotaarnissamut nalornissuteqarneq Qaqortumi utoqqaat illuanni Ajarsivasimmi najugalinnut ernumatitsilerpoq, immikkoortortami aqutsisoq Naja Kriegel oqarpoq. Assi © : Jørgen Semionsen

Qaqortumi utoqqaat illuani Ajarsivasimmi Sulisut piffissami kingullermi ulapputigaat utoqqaat najugaqartut NemKontotaartinnissaat, ulluinnarnilu aqutsisuusup Naja Kriegelip utoqqaat najugaqartut atsiortortippai NemKontotaarniassammata.

Iluatitsivallaanngillalli banki uppernarsaatissaqanngimmat, taamaammalluuna utoqqaat sulisullu maanna nalornilersut utoqqaat utoqqalinersiumaarnersut, Naja Kriegel oqarpoq.

Katrine Hjelholt Nathanielsen naapertorlugu ernumanerat tunngavissaqarluarpoq. Utoqqaaneruppummi pisortanit tamatumuunakkut angujuminaatsineqartut:

- Aap soorunami, inuit ilaqarput nammineq tamatumunnga ikaarsaarsinnaanngitsunik ikiorneqartariaqartunillu, tassami periutsimi tassani eqqortumik siammasissumillu attaveqarnissaq pingaartuuvoq. Kommunelli ilaqarput aallartereersunik aammalu utoqqaat illuanut tunngatillugu aaqqiissuteqareersunik iluminnilu siammarterisunik, paasinarporli ilaannut sapernarsinnaammat.

Paasissutissiinissarsi aatsaat sapaatip akunnerata tulliani pissaaq, tamanna piffissakitsitsivallaannginnerpa?

- Qanoq piffissakitsitsiginerluta paasiumaarparput