Kalaallip napparsimasup toqutaanerata kingorna Aarhusimi tarnikkut napparsimasunut immikkoortortani sillimaneq sukaterneqalerpoq

Kalaallip uninngasup savimmik toqutaanerata kingorna Aarhus Universitetshospitalimi tarnikkut napparsimasunut immikkoortortani tamani timimut tarrassuutit atorneqalissapput.

Allattoq Ritzau, Helle Nørrelund Sørensen

apriilip 04-at 2024 11:01

Nutserisoq Alice Sørensen

Aarhus Universitetshospitalimi tarnikkut napparsimasunut immikkoortortani tamani sulisut, eqqartuunneqarsimasunik pasineqartunilluunniit sullitallit timimut tarrarsuummik peqalissapput.

Napparsimaviup pisortaa Tina Ebler Psykiatrien i Region Midtjyllandimi atorfeqartoq TV 2 Østjyllandimut taama paasissutissiivoq.

Tarnikkut napparsimasunut pinasuartumik katsorsagassanut immikkoortortami taamaallaat timimik tarrarsuutit pigineqaraluarput.

Marsip naalernerani Aarhus Universitetshospitalimi Danmarkimi tarnikkut napparsimasunut immikkoortortami R3-mi angutip kalaallip 46-nik ukiullip, uninngaqatiminik 41-nik ukiulimmik toqutsinerata kingorna timimik tarrarsuutit atorneqalissapput.

Aamma atuarukKalaallip 46-nik ukiullip Danmarkimi tarnikkut napparsimasunut immikkoortortami toqutsineq nassuerutigaa

Napparsimasut Kalaallit Nunaanneersut tarnikkut katsorsagassatut pineqaatissinneqarsimasut, pasineqartut, tigummigallarneqartut eqqartuunneqannginnerminnilu tarnikkut katsorsarneqarnissamik pisariaqartitsisut immikkoortortami tassani uninngatinneqartarput.

46-nik ukiullip inatsisit tunngaviusut naapertorlugit killisiorneqarnermini oqaatigaa, paarineqarani anisinnaanermini Føteximi savimmik pisisimalluni taannalu nassarlugu immikkoortortamut utersimalluni. Tassani pinerlisani aamma kalaaliusoq toqupaa, 'taassuma paamitsatseqqasimammani'.

Ikiaroornartut sakkullu pillugit pasitsaassinermi timisiuisinnaatitaasut

Folketingimi ilaasortaq Aaja Chemnitz (IA) pisup kingorna danskit nunamut namminermut peqqissutsimullu ministerianut Sophie Løhdemut (V) tarnikkut napparsimasunut immkkoortortaqarfimmi sillimaniarneq pillugu apeqquteqarpoq.

Jyllandip qiterpasissuani tarnikkut napparsimasunut katsorsaaviit pisortaata suliaq "peqqarniillunilu alianartorujussuusoq" TV 2 Østjyllandimut oqaatigaa.

Sulisulli piumasaminnik uninngasunik timisiuisinnaanngillat, taamaaliornissarmi tarnip pissussaa pillugu inatsisini maleruagassaqarpoq.

- Ikiaroornartunut sakkunulluunniit pasinartoqavitsinnagu uninngasunik tamanik timisiuisinnaanngilagut, inatsisitigut tamanna piumasaqaataavoq, Jyllandip qiterpasissuani tarnikkut napparsimasunut katsorsaaviit pisortaat Tina Ebler TV 2 Østjyllandimut akissuteqarluni taama allappoq.

Tarnikkut napparsimasunut immikkoortortaq suua?

Tarnikkut napparsimasut immikkoortortami Retspsykiatrisk Afdelingimi Aarhus Universitetshospitalimiittumi katsorsarneqartarput nappaataallu suussusersiniarneqartarluni.

Napparsimasut tamarmik inatsisinik unioqqutitsisimanerminnik eqqartuunneqareersuupput imaluunniit unioqqutitsisimanermik pasineqartuullutik.

Aarhus Universitetshospitalimi immikkoortortami R3-mi napparsimasut Kalaallit Nunaanneersut kisimik tassaniitinneqartarput, tarnikkullu nappaatiminnik katsorsarneqartarlutik.

Tarnikkut napparsimasunut pinerluuteqarsimasutut pasineqartunut eqqartuunneqarsimasunullu nunatsinni katsorsaaveqanngimmat taamaaliortoqartarpoq.

Tusarfik: Psykiatrien, Region Midtjylland i Danmark

Allisiguk

Tina Ebler naapertorlugu unnerluunneqartoq 46-nik ukiulik paarineqarani anisinnaatitaasimavoq. Tamannalu pisinnaasarpoq napparsimasut piffissami sivitsortumi aalaakkaasumik pissuseqarsimagaangata katsorsarneqarnerminillu ingerlatsillutillu isumaqatigiissutinik eqquutitsisarsimagaangata.

- Suliami pineqartumi peqqarniitsumik pissusilersortoqarnissaanut pasineqartoqarsimanngitsoq maannamut paasisat ersersippaat, Tina Ebler TV 2 Østjyllandimut allappoq.

Angut 46-nik ukiulik 2020-mi inuiattut ullorsiornitsinni arnamik toqutsisimasutut taassumalu panianik taamani 15-inik ukioqartumik toqutseriarsimasutut eqqartuunneqarsimasoq KNR-imiit siusinnerusukkut oqaluttuaraarput.

Angutip eqqartuunneqannginnerani tarnip pissussaanik misissuinermi erserpoq, angut silanngajaartuusoq, nakorsallu eqqartuussinermi siunnersortaasartut naapertorlugit skitzofrenimik nappaateqartoq eqqartuunneqarnerani saqqummiunneqarpoq.

Tarnikkut napparsimasunut immikkoortortami pisup kingorna angut 46-nik ukiulik inatsisit tunngaviusut naapertorlugit killisiorneqarpoq sapaatillu akunnerini sisamani tigummigallagassanngortinneqarluni.

Nutaarsiassami kukkunermik nassaarsimaguit uunga allaffigineqarsinnaavugut.