Angut toqutsisutut eqqartuunneqartoq: Tarnikkut nappaatilinnut napparsimmavimmut inissinneqartussanngortoq
![](/sites/default/files/styles/image_934x467/public/article_images/ca9dd418-fd2a-4621-860f-4bc7cc8c203b.jpeg?itok=gRBbTqok)
Arnaq Nuummi siorna Inuiattut ullorsiornermi savimmik tallimanit ikinnerunngitsumik kapineqarluni toqutaavoq. Kapitinnermilu ilaannit uummatimigut kapineqarluni.
Angut 43-nik ukiulik toqutsisutut Eqqartuussisoqarfik Sermersuumi ullumi nassuerutiginnippoq.
Taanna arnap panianik taamani 15-inik ukioqartumik toqutseriaraluartutut aamma unnerluutigineqarpoq – tamanna pinngitsuunerarfigaa, eqqartuussiveqarfiulli toqutsisutut toqutseriartutullu eqqartuuppaa.
Angut Danmarkimi tarnimikkut nappaatillit napparsimmavianni piffissami kililigaanngitsumi katsornarneqarlunilu inissinneqartussanngorpoq.
Angut tamatuma saniatigut katillugit 336.000 koruunit missaannik taarsiissuteqassaaq.
Angutip eqqartuussiviup aalajangginera nunatta eqqartuussisuuneqarfianut ingerlatitseqqiinissaq periarfissarigaluarpaa, angutilli eqqartuussut akueraa, taamaammat eqqartuussivimmi suliaq eqqartuussivitsigut inerniliiffigineqarpoq.
AAMMA ATUARUK Nuummi arnaq 40-nik ukiulik toqutaasoq panialu ikilerneqangaatsiartoq
Pineqaatissinneqartoq eqqartuussivimmi suliami naggataarutaasumik oqaaseqarsinnaatitaanermini oqaaseqanngilaq.
Unnerluussisussaatitaasup, Line Thornbergip eqqartuussut unnerluussisussaatitaasut tunngavilersuutigisimasaat ilorrisimaarutigaa.
- Eqqartuussinerup inernera ilorrisimaarutigaara. Angutip toqutsisutut toqutseriarsimasutullu eqqartuunneqarnissaa piumasarisimavarput, unnerluussisussaatitaasoq oqarpoq.
- Suliami anaanaasoq panialu pineqarmata suliaq ilungersunartuuvoq. Suliaq alianartuuvoq, Line Thornberg oqarpoq.
Toqutsineq
Kalaallit Nunaanni Politiit Nuummi Radiop Qaqqaani ikiortissaminik suaartartoq pillugu 2020-mi juunip ulluisa 21-anni nalunaaqutaq 04.46 nalunaarfigineqarput.
Politiit sumiiffimmukartinneqarput, piffimmullu apuukkamik niviarsiaraq 15-inik ukiulik savimmik kapineqarsimasoq paasivaat. Niviarsiaq ilisimasoq ambulancenit isumagineqarpoq.
Arnaq 40-nik ukiulik inissiami ilisimanngitsoq nassaarineqarpoq. Taanna tallimanit ikinnerunngitsunik kapineqarsimavoq. Kapitinnerisalu ilaat uummataatigut kapisineruvoq, kapisinerlu alla timimi taqamut tillertumut kapisinerulluni, tamannalu arnaq toqqutigaa.
AAMMA ATUARUK Angut 42-nik ukiulik savimmik toqutsisutut unnerluutigineqartoq
Niviarsiaraq 15-inik ukiulik piffissami sumiiffimmilu tassani arlaleriarluni aamma kapineqarput, ilaatigut siutaata aappaata eqqaatigut tuiatalu eqqaatigut. Tamannalu aanaangaatsiarneranik kinguneqarpoq.
Pineqaatissinneqartup niviarsiaraq 15-inik ukiulik timaatigut arlaleriarluni aamma kaperiaraluarpaa, niviarsiararli pinngitsoortitsisarsimalluni.
Arnap toqutaasup niviarsiaraq 15-inik ukiulik panigaa.
Niviarsiaraq 15-inik ukiulik ikilingaatsiarneqarpoq, niviarsiararli qanoq issusaa ajunngitsoq napparsimmavimmiit ulloq taanna paasissutissiissutigineqarpoq.
Eqqartuussissutaasimasut
Angut toqutsisutut toqutseriarsimasutullu eqqartuunneqartoq siusinnerusukkut eqqartuussaareernikuuvoq.
Eqqartuussivimmi suliarineqarsimasut nakuusernermut arnamillu naartusumik pinngitsaaleeriarnermut tunngapput.
Eqqartuussivimmi suliat taakku pillugit tarnikkut napparsimanersoq misissorneqarpoq, taakkunanilu misissuinerni marlunni angut tarnikkut napparsimasutut inernilerneqarluni.
43-nik ukiulik toqutsisoqarnerani suliamut atatillugu tarnimigut napparsimasutut aamma eqqartuunneqarpoq. Tarnikkut misissuineq naapertorlugu toqutsinerup nalaani aamma napparsimavoq. Nakorsaq eqqartuussinermi siunnersuisartoq naapertorlugu angut skizofrenimik nappaateqarpoq.