Nuummi arnaq 40-nik ukiulik toqutaasoq panialu ikilerneqangaatsiartoq
Nuummi politiit pigaartuisa ilaat ullaassaq tallimanut tanneq qulingiluat missaanni kalerrinneqarput. Arnaq ikioqqulluni suaartartoq politiinut kalerriutigineqarpoq.
Arnaq 40-nik ukiulik napparsimmaviliaanneqarpoq, toqusimasutullu tassani nalunaarutigineqarluni.
Allattoq Karsten Sommer
juunip 21-at 2020 17:29
Nutserisoq Mads Lynge
Politiit ornigupput, niviarsiararlu savimmik kapineqarsimasoq paasineqarluni. Arnaq ilisimavoq ikiueqqaartuniillu ikorneqarsinnaasimalluni.
Niviarsiaqqap najugaqarfiani arnaq 40-nik ukiulik toqungasoq politiinit nassaarineqarpoq. Arnaq taanna savimmik aamma kapineqarsimavoq.
Politiit arnamik ikiugasualerput, ambulanciniillu ikiueqqaartut ikiueqqaarneq nangissimallugu. Arnaq 40-nik ukiulik napparsimmaviliaanneqarpoq, toqusimasutullu tassani nalunaarutigineqarluni.
Angut 42-nik ukiulik pasisaasoq
Angut 42-nik ukiulik najukkamiissimasoq politiit misissuinerisa takutippaa, soorlu aamma paasissutissat allat takutikkaat angut savilersornermut attuumassuteqarsinnaasoq.
Angut ullaaq nalunaaqutaq arfineq-marlunut tanneq arfineq-pingasut missaanni tigusarineqarpoq, toqutsisimasutut, toqutseriarsimasutullu pasineqarluni. Angut inatsit tunngaviusoq naapertorlugu Eqqartuussiveqarfik Sermersuumi ualeq manna nalunaaqutaq sisamanut killisiorneqarpoq, killisiuinerlu suli naammassinani.
Arnaq toqutaasoq niviarsiararlu 15-inik ukiulik ikilerneqartoq tassaapput anaanaasoq panialu.
Niviarsiaraq 15-inik ukiulik aqqunartitingaatsiarsimavoq, niviarsiararli ajunngitsoq napparsimmaviup nalunaarutigaa. Ilaqutaasut ilisimatinneqareerput.
Kalaallit Nunaanni Politiit paasissutissanik sukumiinerusunik maannangaaq peqanngillatt, inatsilli tunngaviusoq naapertorlugu killisiuineq naammassereerpat tusagassiutinut nalunaaruteqartoqarumaartoq ilisimatitsissutigineqarpoq.
