Kalaaleq meeqqanik atoqatiginnittunik siammarterisimasutut unnerluunneqartoq
Inuussuttuaqqat 18-it inorlugit ukiullit 1005-it 15-nik ukiullit atoqatigiittut assiginginik videolianillu siammarterisimasutut rigspolitiinit unnerluutigineqartut ataasinngormat saqqummiunneqarpoq.
Unnerluutigineqartunut ilaavoq angut inuusuttoq kalaaleq maanna 18-nik ukioqartoq, politiit oqarnerat naapertorlugu assinik videolianillu unioqqutitsisumik siammarterisimavoq, tamannalu pisimavoq ukiut marluk matuma siornatigut.
Angut inuusuttoq taanna killisiorneqarpoq politiinillu misissiorneqarpoq unnerluutigineqassanersoq eqqartuussivimmilu suliarineqassanersoq, Unnerluussisussaatitaasoq Tobias Berg oqarpoq.
AAMMA ATUARUK Inuusuttorpassuit pornomik meeqqanik inuttalimmik siammarterisimasutut unnerluutigineqartut
- Tullinnguuttoq tassaalerpoq suliap tamassuma qanoq inerneqarnissaata misissuiffigineqarnissaa. Paasissutissanik pingaarutilinnik paasisaqarnerugutta suliaq qanoq ingerlatsissanerlutigu nalilersussavarput, Tobias Berg oqarpoq.
Pineqartoq imaannaanngitsutut meeqqat illersuisuanit isigineqarpoq. Meeqqat atoqatigiittut assiginginik siammarterineq meeqqat kinguaassiuutitigut kannguttaatsuliorfigineqarnerinut assersuunneqarsinnaasoq meeqqat illersuisuat oqarpoq.
- Assit fiilillu kanngunarsaasut, inummut tunngalluinnartut killissanillu qaangiisut siammaattarnerat assersuunneqarsinnaavoq meeqqap kinguaassiutitigut kannguttaatsuliorfigineqarneranut. Tamatumani meeqqap qisuaariaatigisartagai kinguaassiutitigut kannguttaatsuliorfigineqarnermi qisuariaataasartut assigaat. Taamatut eqqugaasup misigisarpai kanngusunneq imminullu pisuutinneq. Kanngusunneq, meeqqap kikkunnut tamanut takusassiarineqarsimanera pissutigalugu, imminullu pisuutinneq, meeraq imminnut nittarsaannermut arlaatigut pisooqataasimasutut misigisinnaasarmat, meeqqat illersuisuat allappoq.
AAMMA ATUARUK Grov børneporno gav 60 dage i anstalt
Kinguaassiuutitigut kannguttaatsuliornerit assigalugit, videolianik assinillu siammarterisimaneq angummut inuusuttumut annertuumik kinguneqarsinnaavoq pineqaatissinneqaruni.
- Inuit kannguttaatsuliorfigineqartut inuunerisa aserorneqarnerisa saniatigut siammartersioq pinerluuteqarsimasut isertitsivianniittussanngorlugu pineqaatissinneqarsinnaavoq. Aamma pineqaatissinneqassaguni pillagaasimanermut aqqa allatorsimaffimmiilertussaassaaq taamatullu meeqqanik pinerliisimannginnermut uppernarsaataani ajortuliorsimasutut allassimasuutigineqalersinnaalluni, Tobias Berg naggasiivoq.
AAMMA ATUARUK Arnat kalaallit pornomik nittartakkami saqqummersinneqartut