Angut meeqqanik atisaqanngitsunik assiutilik ullunik 60-inik pineqaatissinneqarpoq

Europami meeqqanik kinguaassiutitigut atornerluisarneq akiorniarlugu suleqatigiinniit angutip 56-inik ukioqartup internettimi isiginnaartagai pillugit Kalaallit Nunaanni Politiinut ukioq kingulleq saaffigineqarput. tamamtumalu kingunerisaanik angut tigusarineqarpoq, inigisaanilu uppernarsaatissanik ujaasinerminni angutip qarasaasiaa arsaarinnissutigineqarluni.

Nunatta eqqartuussiviani unnerluussaq angut 56-inik ukioqartoq tv-ikkut najuuppoq. Angut qallunaaq 56-inik ukiulik tungujortumik qaamasumik tujuuluaraqarpoq kiisalu isaruaqarluni, taanna illoqarfimmi allamiippoq isiginnaarummullu isigaluni oqaluppoq.

- Pisuussuteqartutut imminut nalunaarutigivunga, angut 56-inik ukiulik oqarpoq. Taanna meeqqanik atoqatiginninniarnernik assilisanik pigisaqartutut unnerluunneqarpoq. Assit 7.000-it sinneqartut angutip nittartakkatigut piffissami aggustip aallaqqaataani 2007-miit marsip 18-ianni 2008-mi tigusarineqarnissani tikillugu pissarsiarisarpai.

Europami meeqqanik kinguaassiutitigut atornerluisarneq akiorniarlugu suleqatigiit nittartakkatigut assinik pissarsisartut kiisalu ikkussuisartut ujartorneqarnerini, Kalaallit Nunaanni Politiit saaffigaat.

Angut 56-inik ukioqartoq meeqqanik ukiukitsunik kinguaassiutitigut atorneqarlunneqartunik assinik nittartakkakkut ujarlerlunilu pissarsisartutut akiuiniaqatigiinnit politiinut nalunaarutigineqarpoq. Tamatuma kingorna angut 56-inik ukiulik politiinit tigusarineqarpoq, qarasaasiaalu uppernarsaatinik imaqartoq arsaarinnissutigineqarluni.

Unnerluussisup Henrik Passip angut pinerluuteqartut inissinneqartarfianni ulluni 60-ini inissinneqartussanngorlugu piumasaqarpoq, akerlianik illersuisup eqqartuussut pineqaatissiinngikkaluartoq piumasaraa.

Assit 5025-t niviarsiaqqanik 18-it inorlugit ukiulinnik atisaqanngitsunik kiisalu imminnut attuualaartunik takussutissiisut angutip pigaai. 462-it niviarsiaqqanik atoqatiginninnernernik assilisaapput kiisalu 70-it niviarsiaqqanik mikisunik kinguaasiutitigut atorluinernit assilisaallutik.

- pisuussuteqartutut imminut nalunaarutiginikuuvunga, takussutissat pigineqarpata miserratiginianngilakka, angut 56-inik ukiulik oqarpoq. Angutip illersuisuata erseqqissaatigaa angut piliani pillugit peqqissimisoq, assillu nassaarisami ilai paqumigalugit nassuiaateqartoq.

- Assit ilai ingasaqaat, eqqarsartarpunga sooruna takugikka, tamannali utoqqatsissutigisinnaanngilara, angut oqarpoq, taanna ulluni 60-ini pineqaatissinneqartut inissinneqartarfianiittussanngorlugu pineqaatissinneqarpoq.

Assini meeqqat 18-it inorlugit ukiullit pineqartut nunarsuarmi sumi tamaneersuupput, nunanilu allani assit sananeqarlutik nittartakkamut ikkunneqarput.

Eqqartuunneqartup kiisalu unnerluussisut suliap inernera suliassanngorteqqissanerlugui ulluni 14-ini eqqarsaatigisinnaavaat.