Transparency Greenland: Pisortat suliffeqarfiutaanni ammanerusumik ingerlasoqarli
Ammasumik ingerlatsisortuuppat tamakku tamarmik pinngitsoorneqarsinnaapput, Transparency International Greenland, TIG, taama isumaqarpoq.
Namminersorlutik Oqartussat Kommuneqarfik Sermersuullu siulersuisuini ilaasortanngortussanik toqqaasarnerit, siulersuisuni ilaasortat qanigisarivallaarsinnaanerinut tunngasunik suliaqarnerit, siulersuisut sulinerinut najoqqutassat, pisortallu suliffeqarfiutaasa ammanerunissaat TIG-ip nalunaarusiamini nutaami misissuiffigineqarput.
- Nunatsinni suliffeqarfissuit pisortat pigisaat amerlasuupilussupput, tamannalu pisortat qanoq ammatigisumik ingerlatsinissaannut sunniuteqartupilussuuvoq, TIG-imi siulersuisuni siulittaasup tullia Naaja Nathanielsen oqarpoq.
Siulersuini ilaasortanik toqqaanermi taakkulu akissarsiaqartinneri pillugit ammasumik pissuseqarnissaq piviusunik aallaaveqarluni oqallinnermi pitsaanerpaavoq, siulittaasup tullia isumaqarpoq.
- Siulersuisuni ilaasortanngortup toqqarneqarneranut tunngavigineqartut ersarissarneqarpata, ilaasortanngortullu piginnaasai aamma ersarissarneqarpata, siulersuisuni ilaasortaanissaanut piginnaasaqannginneranut eqqoriaanerit illuatungilerneqartarput, imaluunniit polikkimit assingusumilluunniit tunngaveqarluni toqqagaasimasorinninneq illuatungilerneqarput.
Taamaattumik TIG arlalinnik kaammattuuteqarpoq, siulersuisuni ilaasortat sulerisimaneri, piginnaasaat, siulersuisunilu ilaasortanik toqqaanermi periutsit pillugit qanoq ammatigisoqarnissaanut tunngatillugu.
Paasissutissanik saqqummiussinerup saniatigut, ammasumik pissuseqartoqarneratigut qanigisanik pingaartitsisoqartarnera allallu naleqqutinngitsut pinngitsoortinneqarsinnaapput, Naaja Nathanielsen taama isumaqarpoq.
- Naammaginanngitsuik piginnaasalinnik toqqaasoqassagaluarpat, taava tamanna saqqummiunneqarumaarpoq inuiaqatigiinnilu ammasumik oqallisigineqarlunilu. Naaja Nathanielsen oqarpoq.
Nalunaarusiaq nittartakkatsinni knr.gl-imi ingerlaqqiffissaq atorlugu pissarsiarineqarsinnaavoq.
