Palle Jeremiassenip arni ilerfiarpaa sianerfigiteriataarporlu
Pingasunngormat Palle Jeremiassen borgmesteritut allaffikumini poortuivoq. Ullumilu allaffimmi tassanerpiaq aamma puiaavoq.
- Suut tamarmik sukkasoorujussuarmik pipput. Tupaqqallungalu attortisimavunga, oqarpoq.
Ippassarmi suut tamarmik mumittut ipput. Ippassarlu ulloq taannaavoq aamma Palle Jeremiassenip arnaata ukiut marluk matuma siorna toqquia. Taamaammat arni ilerfiarpaa.
- Iliveqarfiliarpunga anaanaga eqqarsaatigiartorlugu. Taava mobilera sianeriasaarpoq, sunaaffa illuatungiliuttut ataatsimiissimariaramik ataatsimoorlutik sianerfigigaannga, oqarpallappullu: Kisivit amigaatigaatsigit, arfineq-pingasuuvugut illillu nammineq aalajangissavat borgmesterinngorusunnerlutit, iligissagutsigut.
Anaanama ilerra kaajallaqattaarpara
Inuit ataqatigiit, Atassut, Demokraatit aammalu Naleraq matu matullugu isumaqatiginninniarsarilersoq. Taakkulu amerlanerussuteqassagunik ataatsimik amigaateqarput, amigaataasorlu taannaavoq Palle Jeremiassen.
Taanna qaammatip ataatsip matuma siorna Siumumiit anivoq attaviitsunngorlunilu.
- Akivakka: ukorsiaa ingasappallaaqaaq. Eqqarsarnissannut 1 tiimimik tunilaarsinga. Naluaralu qasseriarlunga pinerpoq anaanama ilerra kaajallannerlugu, oqarpoq.
AAMMA ATUARUK Pisortatigoortumik nalunaarut: Palle Jeremiassen avannaani borgmesterip issiavianut ingeqqippoq
Tassanngaanniit ataatsimiigiarpoq unnuaq marlup qaangernerata tungaanut ingerlasumik.
- Maanna borgmesterinngoqqippunga tamannalu naatsorsuutiginngilluinnaraluarpara!
Akivakka: ukorsiaa ingasappallaaqaaq. Eqqarsarnissannut 1 tiimimik tunilaarsinga.
Illuatungiliuttut isertorlutik ataatsimiinnerat Siumup ilisimanngilaa. Taamaalineranilu partiip borgmesterinngortitassatut naatsorsuutigisaa Sakio Fleicsher isumaqarpoq borgmesterinngortussaalluni.
Misigaarlu Palle Jeremiassenimit qoqassineqartussanngorluni.
- Naluneqanngitsutut Nalerarlu apriilimi suleqatigiinniarluta atsioqatigiippugut, taannalu sapaatip akunnerata matumap tungaanut atuuppoq unnuaq marlup tungaanut, taamaalineranilu borgmesterissatut atorunnaarsinneqarpunga. Isumaqatigiissuterpullu kingulleq aamma taamaatinneqarpoq, KNR-imut oqarpoq.
Siumumut annernarpoq
Palle Jeremiassen neqeroorfigitinnerminut akuersinnginnermini illuatungiliuttut neqeroorutaat aamma eqqarsarnartoqarteqqaarpaa.
- Nalunngilara taakku akuerigukkit Siumumut annernassasoq, naaggaarsinnaasimanngilangali.
Kommunalbestyrelse nutaaq Uummannami ataatsimeeqqaarpoq. Palle Jeremiassen Ilulissaniit oqarasuaatikkut peqataavoq. Ass: Malik Brøns, KNR
- Palleuvunga inuk suli taannaavunga. Siullermik borgmesteritut suleriusera ingerlateqqissavara tassa ammaqatigiinnermik imalik!
- Inussiarnersuuneralu aamma ingerlaqqissaaq allanngornavianngilanga.
AAMMA ATUARUK Borgmesterinngulersoq hashilerisutut pasineqarluni Nunatta Eqqartuussiviani suliassaasoq
Pitsaasaarneq imaluunniit - Avannaata kommuniani sapaatip akunnerini arlalinni saqitsaattoqarpoq.
Apriilip arfernani kommunemut qinersisoqareernerata kingorna Siumut taaneqarnerpaavoq. Siumumi Minik Høegh-Dam qinerneqarnerpaalluni - taamaalillunilu borgmesterinngortussanngoraluarluni.
Taamaattoqanngitsoorporli.
Peersitsineq
Minik Høeg-Dam Siumumiit anisitaavoq, KNR-ip oqaluttuarereermagu, taassuma inatsisit unioqqutillugit hashimik 300 grammimik tuniniaasimasoq, suliarlu taanna Sermersuup eqqartuussiviani marsip 25-iani qineqqusaartoqaleruttornerata nalaani ingerlanneqarsimavoq, taannalu aamma nunatta eqqartuussiveqarfiatigut suliarineqaqqittussaasimalluni.
Palle Jerimiassen Siumumiit anivoq attaviitsunngorlunilu.
Taamaalimmallu Sakio Fleischer borgmesterinngortussanngorpoq taannami qinigaanerpaat pingajuattut inissisimavoq. Taassuma Naleraq suleqatissatut isumaqatigiiissuteqarfigigaluarpaa - pingasunngormalli Siumut nalunaarpoq Nalerarlu suleqatigiikkunnaaginnarniarlutik.
AAMMA ATUARUK Avannaata kommuniani suli eqqisiviilliortut: Siumup Naleraq suleqatigiumajunnaarpaa
Taamatuttaaq kommunep iluani Siumumi siulittaasup nalunaarutigigaluarpaa Siumut nutaamik allamik partiimik isumaqatiginninniassasoq. Sakio Fleischerilu initoqaluni kiserngoruppoq.
Sakio Fleischer. Ass: Malik Brøns, KNR
Palleli illuatungaatigut taamaanngilaq. Misigissutsimigummi sorsukkami.
- Nukara qineqqusaarneq sioqqutilaarlugu toquvoq. Qaammatit marluk piartorpoq, piffissarlu uannut artornarsimavoq, aammalu taakku qaavatigut Siumup iluani saqitsaanneq pivoq, tamatumalu kinguneraa uanga tunuartariaqalerama. Misigissutsit ilai suli inissivinngillat, taamaattumik borgmesterip issiavianut ingeqqinnissara oqitsuinnaanngilaq, oqarpoq.
