Pisortatigoortumik nalunaarut: Palle Jeremiassen avannaani borgmesterip issiavianut ingeqqippoq
Avannaata kommuniani borgmesterinngorniunneq saqitsaassutaasimaqisoq kiisami naammassivoq. Palle Jeremiassen maanna attaviitsuusoq borgmesterinngorpoq...aammaarluni.
Taanna inissititeriffiusumik kattunnermi Uummannami pisumi borgmesterissatut toqqarneqarpoq.
Tamannalu sivitsortumik ingerlasumik aaqqiagiinngiffiusimavoq.
Apriilip arfernani kommunemut qinersisoqareernerani Avannaata kommuniani Siumut amerlanerussuteqarluni taaguunneqarpoq. Siumumeersorlu Minik Høegh Dam taaguunneqarnerpaajuvoq - taamaalillunilu borgmesterinngortussanngoraluarluni.
Taamaattoqanngitsoorporli.
Minik Høegh-Dam Siumumiit anisitaavoq, tamannalu pivoq KNR-ip oqaluttuarimmagu, Minik Høegh-Dam inatsisinik unioqqutitsilluni ikiaroornartumik 300 grammimik tuniniaanikuusimasoq. Suliarlu Kommuneqarfik Sermersuumi eqqartuussivimmi marsip 25-iani pisumi ingerlanneqarsimavoq tassa qineqqusaarnerup nalaani, pinngitsuutinneqareerpallu nunatta eqqartuussiviatigoortinneqartussaalluni.
Palle Jeremiassen Siumumiit tunuarpoq attaviitsunngorlunilu.
Taavalu Sakio Fleischer borgmesterinngortussanngoraluarpoq, taaguunneqarnerpaat pingajuanni inissisimammat. Siumut Naleraq peqatigalugu kommunemi taaguunneqarnerpaavoq - pingasunngormalli Siumut nalunaarpoq, Naleqqamik suleqatiginnikkusukkunnaarluni.
Taamatuttaaq Siumumi kommunemi siulittaasup oqaatigaa, Siumut partiimik allamik isumaqatiginneratarsinnaasoq.
Taavalu Sakio Fleischer initoqaluni kiserngoruppoq. Inuit Ataqatigiit, Atassut, Demokraatit, Naleraq aammalu attaviitsoq Palle Jeremiassen Siumut avaqqullugu kommunalbestyrelsemi suleqatigiissitamik pilersitsimmata, taamaalillunilu attaviitsoq Palle Jeremiassen borgmesterissatut qinerneqarluni.
Jens Ole Nathanielsen Inuit Ataqatigiinneersoq borgmesterip tullersortissaatut siullertut qinerneqarpoq.
IA pingasunik aallartitaqarpoq, Atassummeersut marluk, Demokraatiniit ataaseq Naleqqamiillu marluk iserput. Kommunemi siuttunngortussat attaviitsumit Palle Jerimiassenimit siuttuuffigineqassapput.
Taamaalilluni suleqatigiissitat 17-iusut iluanni qulingiluanik amerlanerussuteqarlutik inissipput.
Avannaata kommuniani Siumut borgmesterinngortitsinngitsoorpoq. Partiilu amerlanerussuteqaannarpoq - Qeqqatali Kommuniani Siumumeersoq borgmesterinngorpoq.