Upalungaarsimanermik Aqutsisoqarfik: Qatserisartut Kalaallit Nunaanneersut Sverigemi qamitsiniaqataanerat nuanneqaaq

Kalaallit Sverigemi qamitsiniaqataajartorlutik tapersiinissaaat Avannaata Kommuniani upalungaarsimanermut pisortaagallartup, Amos Pjettursonip isumassarsiaraa.

Isumassarsiarli taanna oqartussanit tamanit tigulluarneqartoq, Upalungaarsimanermut Aqutsisoqarfiup ataqatigiissaarisuata, Peter Kaas-Claessonip oqaatigaa.

- Illersornissamut ministereqarfik attavigivarput naalakkersuisoqarfiup pisortaa aamma oqaloqatigaarput tamarmik isumatsialaanerarpaat, Peter Kaas-Claesson oqarpoq.

AAMMA ATUARUK Avannaani qatserisartut Sverigimut ikiuukkiartulersut

Nunatta avannaaniit qatserisartut arfinillit aallartinneqarniaraluarput. Qatserisartulli pingasuinnaat aallartinneqarnissaat isumaqatigiissutigineqarpoq, matumani ilinniarsimanermut piumasaqaatit pissutaasunut ilaapput.

- Sverigemut aallartitassagut qatserisartutut ilinniarsimasuunissaat piumasaqaatigaarput. Tassa imaappoq Sverigeliartitagut pisariaqartunik piginnaasaqarnissaat ilinniarsimanissaallu pisariaqarpoq. Taamaammat eqqissisimavugut. Qatseriartornerat ajunngilluinnartumik ingerlassaaq, Kaas-Claesson oqarpoq.

Avannaata Kommuniani siorna juunimi ajunaarnersuaqarnerani ikiuukkiartortoqarneranut qujaniarneq kalaallit qatserisartut Sverigemut ikiuukkiartornissaannut tunngavilersuinermi ilaatigut ilaatinneqarpoq.

AAMMA ATUARUK Qatserisartut nunani allani ikiuukkusuttut

Tamannalu Peter Kaas-Claessonip ajunngilluinnarsoraa, pingaartumik tamanna naalagaaffeqatigiinnerup iluani qatserisartut akornanni suleqatigiilluarnermut uppernarsaatissaammat.

- Tamanna naalagaaffeqatigiinnermi uppernarsaataavoq, pisoqarnerani tassa ikioqatigiilluta suleqatigiilluarsinnaanertinnik uppernarsaataavoq, Peter Kaas-Claesson oqarpoq.

Kalaallit qatserisartut pingasut qatserisartunut 60-inut Roskildep mittarfianiit marlunngorpat ullaakkut danskit nalunaaqutaat malillugu arfinermut aallartussanut ilaassapput.

AAMMA ATUARUK Kun tre brandmænd sendes til Sverige