Avannaani qatserisartut Sverigimut ikiuukkiartulersut

- Avannaata Kommuniani taamatut inissisimaffimmiilluni qanoq ajortiginera nalunngilarput. Taamaattumik katillugit qatserisartut arfinillit ikuallannerup siaruaatinnginnissaa siunertaralugu aallartissavagut, Avannaata Kommuniani bormesteri, Palle Jerimiassen taama tusagassiuutinut taama nalunaaruteqarpoq.

Qatserisartut Upernavimmit marluk, Uummannamit marluk kiisalu Ilulissaniit marluk aallartinneqarnissaat pilersaarutaavoq. Naatsorsuutigineqarporlu qatserisartut ullut 14-it Sverigimiissasut. Suliniuteqarneq Danmarkimi Upalungarsimasut Aqutsisoqarfiat suleqatigalugu ataqatigiissarneqarpoq.

Qaasuitsup Kommunia Nuugaatsiami aamma Illorsuarni ajunaarnersuarmik siorna eqqugaavoq. 
- Tamatta ajunaarnersuarmik eqqugaalluni qanoq ajortigisoq misigaarput. Aammattaaq ulluinnatsinnit ungasikkaluaqisoq qanoq anilaanganartiginera aamma toqqissisimannginnera misigaarput. Aallaqqaataani amerlaqisut soriarsinnaanngissusermik kiisalu pisup annertussusaanut sanilliullugu kiserliuummernermik misigisaqarput, borgmesteri oqarpoq nangillunilu:

Kisianni pissutsit allanngorput nunani avannarlerni nunat tamarmik kinaassusertik takutimmassuk ikiorserniarlutalu aalajangerlutik. Kommunitsinni tamatsinnut annertuumik oqilisaataavoq avannaamioqatigut qaninnerpaat kikkuusut nalunnginnatsigit taakkulumi taamaalinerata nalaani ajornerpaaffiani sanitsinniipput.

Qatserisartut siulliit Upernavimmit, Uummannamit Ilulissaniillu pingasut aallartinneqassapput, taakkualu juulip 31-anit aggustip tallimmaata tungaanut ikiuutissapput,  Avannaata Kommuniani upalungaarsimanermut pisortaagallartoq, Amos Pjettursson oqarpoq.