Københavnip timmisartoqarfissua qarasaasiatigut pinerliinianit saassunneqarniakkajuttoq
Københavnip timmisartoqarfissuata Danmarkimi angallannermi pingaarnerit ilaattut inissisimanera pissutaalluni pinerliinianit innarlerneqariaannaavoq.
Tamanna pissutaagunarluni Ukrainep saassunneqarneraniilli timmisartoqarfissuaq qarasaasiatigut arlaleriarluni saassunneqartaraluarpoq.
Pisortaaneq Thomas Woldbye taama naliliivoq.
AAMMA ATUARUK Nunarput qarasaasiatigut pinerliinianut isumannaallisarnerulertoq
- Timmisartoqarfiup ingerlanneqarnera innarlerniarsaraat. Saassunneqarnissaanut soqutiginnittoqariartuinnartoq takusinnaavarput - pingaartumik Ruslandiminngaanniit - taamaaliornissamullu atortugissaarnerulerlutillu akissaqarnerulersimapput, taanna Berlingskemut oqarpoq.
Russit naalagaaffiannit aningaasalersorneqarlutik qarasaasiatigut pinerliiniat Ukrainemi sorsuttoqalerneraniit qaammatini siullerni qarasaasiatigut pinerliinianit allanit namminersortunit saassunneqarnissartik pinngitsoortinniarsarigaat taamaammallu russit saassussisarnerat sakkortusiartuinnartoq, nittartakkakkut pisunik immikkut ilisimasalik Peter Kruse qarasaasialerinermi isumannaallisaavimmit CSIS-imeersoq oqarpoq.
AAMMA ATUARUK Immikkut ilisimasalik: Qarasaasiatigut pinerliiniartartut aningaasannakkusullutilluunniit paasissutissannakkusuttarput
Qarasaasiatigut saassussisartut namminersortut taassuma saniatigut piumasaminnik iliorsinnaanerulersimapput.
- Qarasaasiatigut pinerliiniat saassussisarnerat sakkortusiartuinnavissimavoq, inatsisitigummi malersorneqarnissartik annilaanngatigivallaarunnaarsimagunarpaat. Sorsuttoqaleruttorpormi, tamannalu pillugu nunanik killerneersunik saassussisarnerulersimallutik, Peter Kruse Berlingskemut oqarpoq.
Ruslandimiit qarasaasiatigut saassussinerit aasarli sakkortusiartuinnavissimasut, taanna oqarpoq isumaqarlunilu taakkunannga amerlasuut danskit suliffeqarfiisa oqaluttuarisanngimmatigit tusarneqartanngitsut.