Københavnimi kalaaliminissaaleqisoqartoq
Pisiniarfiummi Tranhusip Kalaallit Nunaannit pisiniartarnini unitsissimavaa.
Københavnimi Kalaallit Illuutaata maanna kalaallit peqatigiiffii kajumissaarpaat ataatsimut pisiniaqatigiittaleqqullugit.
Tranhusip kalaaliminernik tuniniaasarunnaarnera Københavnimi Kalaallit Illuutaanni malugivaat.
Taakkumi marlunngornikkut nerisitsisarnerminnut neriartortartunut 40-it missaanniittunut Tranhusimi aalajangersimasumik pisiniartartuusimagaluartut, pisortaq Leise Johnsen oqarpoq.
- Maani marlunngornikkut nerisitsisarnitsinnut kalaaliminernik pissarsiniartarneq ajornakusoortarpoq.
- Marlunngornikkut nerisitsisarnerput ingerlatiinnassavarput, aalisakkanik Kalaallit Nunaanneersunik pissarsisarpugut, taavalu savaaqqap neqaanik maanngaanneersunik allanillu pissarsiarisinnaasatsinnik tapertarlugit.
Tranhusimik ingerlatsisup Jette Dybdalip kalaaliminernik tikisitsisarunnaarnerminut peqqutaasoq oqaatigerusunngilaa.
Tusarfiilli allat naapertorlugit Kalaallit Nunaanniit nerisassanik annertuunik tikisitsisarnerit naliginnaasumik assut suliakkersuutaasarput. Pissutigalugu nioqqutissat ataasiakkaat tigusisussamut ataatsimut allassimasariaqarmata. Pissutaasunullu ilaavoq nassiussap ataatsip 5 kilo sinnersimappagu danskit ilanngaaserisuinit akiligassiisoqartarmat.
Aammalu nassiussat Danmarkimut tikinniariaraangasa qerititsivinniitittariaqartarmata.
Eqqussuinermut malittarisassat
Inuiinnaat neqimik 10 kilomik (soorlu puisip neqaanik) nioqqutissianillu immuttalinnik tikisitsisinnaapput. Aalisakkat tisaneqarsimasut suliarineqarsimallu killilimmik eqquteqqusaapput.
Assersuutigalugu inuit qulit kattullutik tikisitsiggaluarunik, tamarmik immikkut 10 kilonik tikisitsisinnaappat - naak ataatsimoortumik nassiussinermi 100 kilot nassiunneqaraluartut.
Peqatigiiffiit nassiussinermi ataatsimi inummut ataatsimut katillugit 5 kilot tikisissinnaavaat - naak ataatsimoortumik nassiussinermi 100 kilot ataatsimoortillugit nassiunneqarsinnaasut
Nunatsinnit Danmarkimut inuussutissanik eqqussuinermut malittarisassat atuakkit
Najoqqutarisaq: Danmarkimi inuussutissanut aqutsisoqarfik
Qerititsivinnut inissaqartitsitsinngitsut
Kalaallit Illuutaanni Aarhusimiittumi kalaaliminernik allattorsimaffinnut 4000-inut tikisitsisarput qerititsivinnilu qulini qerititarisarlugit.
Københavnimi Kalaallit Illuutaanni pisiniarusuttaraluarput qerititsivinnili inissaqartitsinatik pisortaq Leise Johnsen oqarpoq.
- Københavnip qeqqani Illumilu qerititsivissaqanngilaq.
Taarsiullugu kalaallit peqatigiiffii Københavnimiittut Sjællandimiittullu kajumissaarpai peqatigiillutik qerititsivissarsioqqullugit tamaani najugallit kalaaliminertoqqittalerniassammata.
KNR-ip peqatigiiffik Sjællandimiittoq 80-inik ilaasortalik attavigisimavaa. Taassumali ataatsimut tikisitsisarnissaq qerititsivissaqartinnagulu piareersimaffiginngikkaa siulittaasua Elisa Gissum oqarpoq.
AAMMA ATUARUK Kalaaliminernik pisiortorneruvugut
