Kalaaliminernik pisiortorneruvugut

Tamannalu ukiumut tuniniaaffiusumut 2013-14-imut naleqqiullugu 2,5 millionit koruuninik siuariarneruvoq, Royal Greenlandimmi Nunatsinni tunisassianik tuniniaavia piffissami tassani 17,5 millionit koruuninik kaaviiaartitaqarmat.

- Ukiumi tuniniaaffiusumi 2014-15-imi kalaaliminernik tuniniaanitsigut 20 millioner koruunit anguagut,- aatsaat taamak tunisaqartigaagut, Nunatsinni tunisassianik tuniniaavimmi tuniniaanermik ingerlatsisoq Malik Hegelund Olsen tulluusimaarluni RG-ip nittartagaanut taama oqarpoq.

Aalisakkanik assigiinngitsunik tunisassiat 220 tonsinik annertussuseqartut ukiumi tuniniaaffiusumi 2014-imi oktobarimit 2015-imi septembarip qaammataa tikillugu Nunatsinni tunisassianik tuniniaaviup tunisimavai.

- Annertunerusumik qullukkat, mattaat aammalu saarulliit issimit panertitat tunineqarnerat ukiumi kingullermi annertuseriarsimasoq, Malik Hegelund Olsenip oqaatigaa.

Tunisassiat ineriartortinneqarsinnaanerat neriunaateqartoq
Tunisassiat amerlanerpaartaat Nunatsinni pisiniarfinnut Pilersuisoq A/S-imut, Pisiffimmut aammalu Kalaallit Nunaanni Brugseninut tunineqarput. Københavnimi kalaaliminernik tuniniaavik Tranhuset aamma Danmarkimi Kalaallit Illuutaat aamma kalaaliminernik pisisartuupput.

- 2019-imi nunatsinni tunisassianik tunisinitsigut 40 millionit koruunit nalingini palllillugit kaaviiaartitsinissarput anguniarparput. Tunisassiat ineriartortinneqarsinnaanerat neriunaateqarpoq, uagullu ineriartortitsinnaaneq atorluarusupparput, Malik Hegelund Olsen oqarpoq