Royal Arctic Line: Aarhusimut nuunneq inuiaqatigiit millionerpassuarnik iluanaarutigisinnaagaat
Umiarsuaatileqatigiiffiup Namminersorlutik Oqartussat pigisaata nalunaarusiaani inerniliussat ilaat taama allassimavoq.
Ullumikkutut inneratigut aalisakkat qaleruallillu Danmarkimi suliareqqinneqartarnerat nunamut iluanaarutaasarpoq. 2013-imi nunatta 2,9 milliardit avammut nioqqutigai, Danmarkillu kalaallit aalisaagaannik qalerualiutaannillu nunarsuarmi niuerfinnut nioqquteqarnini 300 millionit koruuninik iluanaaruteqarfigalugu.
Aalborg umiarsualivittut pingaarnertut atorunnaarlugu Aarhus atorneqalissappat aningaasat taakku ilaat tassa ukiumut 80 millionit koruunit kalaallit inuiaqatigiivisa iluanaarutigisalersinnaavaat.
AAMMA ATUARUK RAL-ip umiarsuai Aarhusimut tulattalissapput
Toqqaannartumik avammut nioqquteqarsinnaalernermi nioqqutissiat containerimi ataasiinnarmiitillugit nunamut tunisiffiusussamut assartorneqarsinnaalissapput.
Jyllandip qeqqaniittumit umiarsualivimmit nunanut allanukartartut amerlanerungaatsiarput, Royal Arctic Linelu naapertorlugu tamanna nunatsinniit toqqaannartumik avammut nioqquteqarniarnermut ajornannginnerulersitsissaaq.
Nioqqutissat umiarsuakkut ullumikkut Aalborgiliaanneqareeraangamik kingorna biilersuarnik umiarsualivinnut anginerusunut assartorneqartarput tamassumalu kingornatigut aatsaat nunarsuarmi sumiiffinnut allanut umiarsuarmik ingerlateqqinneqartarlutik.
RAL-ilu naapertorlugu umiarsuaatileqatigiiffiup Aarhus umiarsualivittut pingaarnertut atulissappagu suliareqqiisarneq tamaat nunatsinnut nuutsinneqarsinnaassaaq, taamaalilluni nunatsinni suliffissat amerlanerulissapput iluanaarutissaqarnerulissallunilu
AAMMA ATUARUK Aarhus avammut nioqquteqarnermut periarfissanik pitsaanerusunik pilerisaarisoq